مع رانيا.. وصفات علشان تحافظي على رشاقة جسمك

أعده للنشر: مها مصطفى
أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"..
وفي حلقتنا النهارده هنقول نصايح علشان يبقى نظام أكلنا صحي ومفيد للجسم، وهنعمل بعض المشروبات اللي بتساعدنا على تسييح الدهون في الجسم مع اتباع الريجيم..
قرفة بالقرنفل
المقادير:
* 3 مسامير قرنفل
* 1/ 2 ملعقة ممسوحة قرفة
* فنجان ميه
الطريقة:
1- هنحط كل المقادير دي مع بعض، ونسيبها على النار يغلوا، وبعد كده نشربها سخنة.

إضغط لمشاهدة الفيديو:
نصائح لنظام أكل صحي
أهم حاجة علشان نحافظ على صحتنا وعلى رشاقة جسمنا هي الأكل الصحي اللي بيفيد الجسم من غير ما يسبّب أي مشكلات، لكن المشكلة دايما هي العادات الخاطئة اللي بنعملها؛ ومنها أكل حاجات ضارة ومليانة بالسعرات الحرارية بين الوجبات؛ زي الشيبسي والساندوتشات السريعة.
اللي محتاجين نفهمه إن الأكل بين الوجبات مافيهوش مشكلة، لكن لازم ناكل حاجات مفيدة وصحية؛ زي الفاكهة والخضراوات الطازجة، والخيار، والجرجير والبقدونس.
ومش لازم ننسى منتجات الألبان؛ يعني نراعي دايما إننا نشرب لبن خالي الدسم يوميا؛ لأنه بيساعد على حرق الدهون، وممكن ناكل جبنة ونحط عليها زعتر وزيت زيتون.
وبالنسبة للوجبات الأساسية يُفضّل إنها تتكوّن من أكل مشوي أو سوتيه، أما بالنسبة للمشروبات؛ فالشاي الأخضر بيسيّح الدهون، وكمان القرفة، وعليها القرنفل، أو الزنجبيل.
ودلوقتي هنعمل شوربة لسان عصفور بالبرتقال، والشوربة دي مفيدة جدا وبتساعد على التخسيس..
شوربة لسان العصفور بالبرتقال
المقادير:
* فنجان لسان العصفور
* قطعة زبدة أو سمنة في حجم البندقة
* 2 أو 3 كوب عصير برتقال
الطريقة:
1- هنسيّح الزبدة على النار، ونحمّر فيها لسان العصفور، وبعدها نحط عليه مقدار مية مناسب، ونسيب لسان العصفور على نار هادية لمدة ربع ساعة أو لغاية ما يستوي.
2- بعد كده هنضيف عصير البرتقال، ونسيبه يغلي مع الشوربة شوية، وبعد كده نرفع الشوربة من على النار ونعصر عليها ليمون، وممكن نضيف لها ملعقة قشطة.
ملحوظة:
ممكن نستبدل المية العادية اللي حطّيناها على لسان العصفور بمية سلق الكرنب؛ لأنها بتخسّس جدا، والشوربة دي مغذية جدا وبتدفّي ومقاومة للبرد.

إضغط لمشاهدة الفيديو:
كريم جوز الهند لترطيب الإيدين والقدمين
علشان حلقتنا ماينفعش ما نعملش فيها وصفاتنا الطبيعية اللي متعوّدين عليها، وبناءً على طلبكم هنعمل مع بعض النهارده كريم بمكونات طبيعية 100% لتنعيم بشرة الإيدين والقدمين.
المقادير:
* 3 ملعقة كبيرة فازلين طبي
* ملعقة كبيرة زيت جوز هند
* ملعقة كبيرة جلسرين
* ملعقة كبيرة نشا
* ملعقة صغيرة زيت ورد
الطريقة:
1- نسيح الفازلين على النار، وبعد كده نضيف عليه زيت جوز الهند والجلسرين وزيت الورد والنشا، وندوّبهم كلهم مع بعض، ونحتفظ بالكريم ده في برطمان زجاجي في الثلاجة.
الكريم ده مفيد جدا لبشرة الإيدين والقدمين؛ لأنه بيساعد على تنعيمها وترطيبها، وبيخلّي رائحة البشرة جميلة وعطرة، بالإضافة إلى أن كل المكونات اللي فيه بتساعد على تفتيح البشرة.

إضغط لمشاهدة الفيديو:

وبكده خلصت حلقتنا النهارده..
استنونا مع حلقات جديدة..
وماتنسوش تبعتوا لنا رأيكم في الحلقة..
وكمان كل الأسئلة اللي عايزين تعرفوا إجابتها..
سلام،،،