د. محمد أبو الغيط: قلة الأكل لا تساعد على فقدان الوزن!

السلام عليكم.. أنا كان عندي سؤال، أنا عندي 17 سنة ووزني 76، وطولي 164، أنا لما كان عندي 15 سنة كان وزني 85 وبدأت أنزل كتير، وأنا جسمي بيستجيب بسرعة؛ بس أنا نفسي أوصل لوزن 60 كيلو؛ بس مش عارفة أنا ممكن في اليوم آكل وجبة واحدة مع الرياضة؛ بس أنا محتاجة أخس بسرعة.


الصديقة العزيزة.. غير صحي تماماً إنك تاخدي وجبة واحدة يومياً، ولازم على الأقل تاخدي 3 وجبات في اليوم، وللسرعة لازم تمشي على ريجيم صحي تحت إشراف دكتور متخصص وتلتزمي به تماماً، وكمان لازم تواظبي على رياضة المشي السريع كل يوم لمدة ساعة، وممكن تاخدي دواء يسرع من عملية الحرق؛ لكن تحت إشراف طبي. ومع الصبر والمواظبة هتوصلي للوزن اللي إنتي عايزاه بسرعة.


أنا كنت عايز أستشير دكتور محمد.. أنا عايز أقلل من الوزن، أنا لما باكل الوزن بيزيد، مش عارف أعمل إيه، وكمان ما عنديش وقت إني ألعب جيم؛ فعايز أعرف تعليمات للأكل أمشي عليها.


الصديق العزيز.. فيه نصائح بسيطة ممكن تعملها علشان تقلل من وزنك، وهي إنك تقلل من كميات الأكل اليومية، وتقلل من نسبة الدهون؛ مع الإكثار من تناول الفاكهة ما عدا البلح والمانجو والتين والموز والمشمش والعنب والكاكا والقشطة والكريز.
ومن الممكن ممارسة رياضة بسيطة جداً زي نزول السلالم أو المشي السريع.


كنت عاوزة أسأل الدكتور: هل سكر الدايت ممكن يكون فيه أي ضرر على البيبي؟ أنا عندي بيبي عنده 8 شهور، وعاوزة أعمل ريجيم، ومشكلتي في سكر الدايت. أرجو الرد للأهمية.


الصديقة العزيزة.. ما فيش مشكلة خالص من السكريات البديلة على البيبي، وده على حسب آخر أبحاث اتعملت سنة 2004، وممكن تاخدي السكر العادي؛ لكن بكميات قليلة علشان تكوني مرتاحه نفسياً.