أنا باشكر الموقع بتاعكم لأني بجد باستفيد منه كتير أوي، وسألت كتير عن مواضيع وأنا باخد كلامكم وأنفذه. أنا عندي 21 سنة، ومريت بتجارب كتير وطلعت فاشلة، قررت ما ارتبطش خالص إلا لما ييجي لي نصيبي، أنا الحمد لله باعرف ربنا، وباصلي ومرتبطة بربنا جدا، الحمد لله جيت من 3 أيام كنت في مكتب البريد باشتري خط، قابلت شاب عنده 23 سنة بيشتغل في مكتب البريد متعين فيه، هزرت معاه وخرج ورايا وقال لي: إن أنا مناسبة ليه وعاوز يكلمني، خد رقمي وخدت رقمه، وكلمني قال لي: إنه معجب بي وهيتقدم؛ بس مستني بس الشقة بتاعته زنقاه شوية؛ بس في أقرب فرصة هييجي يكلم بابا؛ مع العلم إنه عارف أخوي وبابا عشان كانوا دايما بيروحوا هناك، هو قال لي إني عاجباه جدا، وكل شوية يكلمني ويتطمن علي وبيقول لي إنه لسه عارفني بس حبني، أنا بصراحة مش عارفة أعمل إيه؟ أكمل معاه واشوف عاوز إيه؟ ولا أحاول ألزمه؟ بس أنا حاولت قال لي: إن ظروفه دلوقتي صعبة شوية؛ بس على قد ما يقدر هيحاول يكون في أسرع وقت. هاستنى ردكم أعمل إيه، وميرسى وآسفة على التطويل. هبه