زيت الأفوكادو لإيدين ناعمة وأظافر قوية

أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، وفي حلقتنا النهارده هنكمّل كلامنا عن العناية بالإيدين والأظافر، ومعظم ماسكاتنا هتكون عن العناية ببشرة الإيدين، والحفاظ عليها ناعمة من غير تجاعيد بعد سن 35..
كريم اللانولين والعسل
المكونات:
* قطعة لانولين بمقدار ملعقة كبيرة
* 2 ملعقة كبيرة زيت جوجوبا (لسن فوق 35)
* ملعقة كبيرة عسل
ملحوظة:
لو سنك أقل من 35 يبقى بتستخدمي زيت اللوز بدلا من زيت الجوجوبا.
الطريقة:
1- سيّحي قطعة اللانولين في وعاء على النار لغاية ما يسيح، وبعد كده ضيفي زيت الجوجوبا، وقلّبيهم مع بعض كويس لغاية ما الزيت يمتزج مع اللانولين.
2- في الآخر خالص ضيفي العسل، وارفعي الخليط من على النار، وصبّيه في برطمان زجاج، وشيليه في الثلاجة.
3- عايزة أوضح إننا استخدمنا زيت الجوجوبا لسن فوق 35؛ لأنه بيحفّز الجسم على إنتاج مادة الكولاجين اللي بتقاوم ظهور التجاعيد، أما لو سنك أصغر من كده؛ فممكن زي ما قلنا تستخدمي زيت اللوز الحلو.
الكريم ده بيغذّي الإيدين والأظافر بشكل رائع، ومفيد لبشرة الجسم بالكامل، بالإضافة إلى إنه بينعّم ملمس الأظافر، وبيساعد على أنها تنمو بشكل أسرع، والماسك ده ممكن تستخدميه يوميا لبشرة إيدك ولأظافرك.
زيت الأفوكادو.. لأظافر قوية وإيدين ناعمة بعد سن 35
زيت الأفوكادو من الزيوت اللي بتحتوي على نسبة كبيرة من الكولاجين؛ زي زيت الجوجوبا؛ علشان كده أنا بافضل استخدامه بعد سن 35؛ لأنه بيحفّز إنتاج الكولاجين على سطح البشرة علشان يخلي البشرة مشدودة، وخالية من التجاعيد.
ودي بعض الوصفات اللي ممكن نستخدم فيها زيت الأفوكادو للعناية بالأظافر:
1- اخلطي ملعقة كبيرة من زيت الأفوكادو مع ملعقة كبيرة عصير طماطم ورشة ملح بسيطة، وادعكي أظافرك بالخليط ده.
2- اخلطي ثمرة بطاطس مسلوقة ومهروسة ومعاها ملعقة كبيرة عسل وملعقة كبيرة زيت أفوكادو، واعملي بالخليط ده مساج لإيدك، والوصفة دي بتغذّي الأظافر جدا وبتطولها وبتنعم الإيدين جدا، وكمان مفيدة لبشرة الوش.
3- اعملي مساج لأظافرك وإيديكي بخليط من الخميرة البيرة والأفوكادو.

إضغط لمشاهدة الفيديو:

وبكده تكون خلصت حلقتنا النهارده..
استنونا الأسبوع الجاي مع حلقة جديدة..
وفي انتظار تعليقاتكم وأسئلتكم..
سلام،،،