شوربة الفراخ بالمكرونة على "سفرة دايمة"

طبعا في الجو البارد ده بنبقى محتاجين على سفرتنا طبق شوربة ساخن؛ وعلشان تجددي في أطباق الشوربة دايما هنقدّم لك النهارده طبق شوربة جديد، هو شوربة الفراخ بالمكرونة والقرنبيط، تابعينا....
شوربة الفراخ بالمكرونة والقرنبيط
المقادير:
1/ 4 كيلو صدور فراخ
كوب مكرونة صغيرة
3 3/ 4 كوب شوربة
2 ملعقة كبيرة زيت
بصلة متوسّطة مفرومة
1 1/ 2 كوب جزر مفروم
1/ 4 كيلو قرنبيط يقطّع قطع صغيرة
2 ملعقة صغيرة خليط من الريحان والزعتر والروزماري
ملح وفلفل
الطريقة:
1- قطّعي الفراخ قطع صغيرة، وشوّحيها في زيت ساخن مع البصل والجزر والقرنبيط؛ لحد ما المكوّنات تبقى لونها دهبي.
2- بعدين صُبّي عليهم الشوربة، وحُطّي الأعشاب وسيبيها على النار لحد ما تغلي، وبعدين ضيفي عليها المكرونة، وسيبيها لحد ما تغلي مرة كمان، وغطّيها وسيبيها على النار لمدة 10 دقائق.
3- تبّليها بالملح والفلفل، وممكن تضيفي جبنة شيدر حسب رغبتك، وقدّميها.. وبالهنا والشفا.

خلصت حلقتنا النهارده..
استنونا كل يوم مع أكلات جديدة..
سلام،،،