بالميزوثيرابي حاربي تجاعيد البشرة وخليها دايما نضرة

هنكمّل كلامنا النهارده عن فوايد الميزوثيرابي واستخداماته، وإزاي إنه بيساعد في علاج التجاعيد الدقيقة وكمان بيرجّع النضارة للبشرة، وكمان هنعرف فوائد حقن النضارة للبشرة والجسم كله، تابعونا..
إمتى نستخدم الميزوثيرابي للتجاعيد؟
التجاعيد مشكلة بتضايق السيدات والبنات، والميزوثيرابي يعتبر من الطرق الفعالة للتخلص منها لكنه مش بيعالج أي نوع؛ لأن التجاعيد لها 3 مراحل في التكوّن (دقيقة ومتوسطة وعميقة).
التجاعيد الدقيقة بيكون سهل علاجها في بداية تكوينها، ولها طرق علاج كتيرة أوي، ولو بدأنا علاجها من الأول الموضوع بيبقى أسهل، وبيكون لها علاجات كتيرة بداية من الكريمات الخاصة بالتجاعيد، وده فعّال بالنسبة للناس اللي بتكون مهتمة ببشرتها من وقت مبكر؛ يعني ماينفعش بعد سن الخمسين نبدأ نعرف إزاي نهتم ببشرتنا، كمان من ضمن العلاجات دي حقن النضارة.
أما التجاعيد المتوسطة بيكون علاجها عن طريق البوتوكس والفيلر -زي ما قلنا في حلقة سابقة- وده بالنسبة للتجاعيد المتوسطة اللي عمرها 5 أو 6 سنوات.
أما التجاعيد العميقة بيكون علاجها أصعب، وبعد العلاج بيكون لسه فيه آثار للتجاعيد، بعكس التجاعيد الدقيقة والمتوسطة.
حقن النضارة
الحقن دي بتبقى عبارة عن مادة الفيلر أو الهيلرونيك أسيد بتركيزات بسيطة أوي بحيث إنها مش بتعبي الوش ولكن بتدّي له نضارة، ولو فيه تجاعيد رفيعة بدأت تظهر خصوصا في المنطقة حول الفم أو جانب العين بنحقنها بالمادة دي، اللي بدورها بترجّع النضارة للبشرة وبتخلق كولاجين جديد، وبالتالي مش هيبقى فيها تجاعيد، لكن لو أهملناها التجاعيد هتزيد وتبقى أعمق والعلاج هيبقى أصعب.
فيه نوع تاني من حقن النضارة مكوّن من مادة الجلوتاسيون وهي مادة طبيعية جدا مضادة للأكسدة وبتستخدم في علاج حاجات كتير أوي؛ منها السرطان؛ وده لأنها بتساعد على خروج السموم من الجسم وبتمنع أكسدة الخلايا في الجسم كله خصوصا لو اتحقنت في الوريد أو العضل، ولما بتتحقن ميزوثيرابي أو تحت الجلد بتشتغل على منطقة معينة وتجدد الخلايا وتعالج التجاعيد الدقيقة وتدي للبشرة نضارة أكتر.
ممكن كمان نخلط المادة دي مع فيتامين سي c وطبعا الفيتامين ده له فوايد عديدة جدا سواء استفدنا منه عن طريق الأكل أو الشرب أو في الكريمات، والمعروف إنه بيقوي جهاز المناعة جدا بالإضافة إن مادة الجلوتاسيون كمان بتقوي جهاز المناعة.
لما بنخلط المادة دي مع الفيتامين بتعمل تأثير قوي أوي في التفتيح، سواء للهالات السوداء أو أي بقع موجودة في البشرة، بنحقن المناطق دي ميزوثيرابي بحقن النضارة وبتجيب نتايج هايلة جدا.
فوائد حقن النضارة
المادة دي مفيدة جدا للجسم كله؛ بتحسّن الصحة وتنشط جهاز المناعة وتخلّي الجسم أنشط بكتير؛ لأنها بتشيل السموم من الجسم وبتنقيه من جوه وبالتالي بيبقى صحي أكتر، بالإضافة إنها بتفتّح الجسم لأنها بتقلل إفرازات الخلايا الصبغية المسئولة عن إنتاج صبغة لون الجسم، وبالتالي الحقن دي بتساعد على تقليل إنتاجها وتفتيح الجسم درجة أو درجتين، بس ده طبعا مش معناه إنها هتخلي البشرة السمرا تبقى بيضاء؛ لأن ده بيحكمه عوامل كتيرة؛ زي: الجينات ومقدار إنتاج الخلايا الصبغية، ولكن بتفتّح البشرة درجة أو درجتين خلال الجلسات.
(Lifting & firming) لشدّ البشرة
من أنواع الحقن المفيدة كمان في الميزوثيرابي هي حقن (lifting & firming)، والحقن دي بتساعد في شد الجلد ولكن في المراحل الأولى من التجاعيد مش بعد ما الوش كله يبقى متهدل، وعلشان كده هتكون مفيدة وفعالة جدا مع بداية ظهور التجاعيد فقط لأن الوقاية خير من العلاج، والأفضل إننا نستخدمها في وقت مبكر.

إضغط لمشاهدة الفيديو:
خلصت حلقتنا النهارده..
استنونا في حلقة جديدة ومعلومات كتيرة..
في كل ما يخص البشرة والشعر..
سلام،،،