لنعومة شعرك.. بقدونس وقرنفل ولافندر

أهلا بكل بنات "قمر 14" وحلقة جديدة من حلقات "جمالك من الطبيعة مع رانيا"،

النهارده في حلقتنا هنتكلّم عن طرق العناية بالشعر في فترة الخريف والشتاء؛ علشان يكون صحي أكتر وشكله أحلى.

فوائد البقدونس
- البقدونس بيحتوي على فيتامين a، c بنسبة عالية جدا، وكمان بيحتوي على نسبة كالسيوم أعلى من اللي موجودة في اللبن، ودي حاجة مش معروفة لكل الناس، وعلشان كده أكل البقدونس بكترة بيقوي العظام والعضلات.
- البقدونس بيقوّي النظر جدا.
- كمان البقدونس بيحافظ على الشعر من الرطوبة وعلى نسيج البشرة الخارجية.
حَبة البركة والزبادي للشعر الجاف
المكونات:
3 ملاعق متوسّطة زبادي بلدي (بدون قشطة)
ملعقة كبيرة حبة البركة مطحونة
ملعقة كبيرة زيت حبة البركة
ملعقة كبيرة زيت زيتون
الطريقة:
هنقلب الزبادي، وبعدين نحط عليه مطحون حبة البركة، وبعدين نضيف زيت حبة البركة، بس نرجّه كويس قبل ما ناخد منه، ونحط زيت الزيتون ونقلّب الخليط كويس أوي.
الكمية دي هتناسب الشعر القصير، ولو الشعر طويل يبقى هنضاعف الكمية.
هنحط الماسك ده على جذور الشعر وعلى الشعر نفسه بعد ما نكون غسلناه، ونسيبه لمدة ساعة إلا ربع وبعدين نغسله.
بعد الماسك هتحسّوا بنتيجة هايلة من تقوية وتغذية لجذور الشعر، وكمان هيطول الشعر ويطرّيه، وده بسبب الزبادي، وكمان الزبادي بيساعد على تنظيف الساق الخارجي للشعر، وبيتغلغل جوه الشعر نفسه وبيدّي له نعومة.
البقدونس لصحة ولمعان الشعر
البقدونس ممكن نستخدمه بأشكال مختلفة؛ سواء هنغليه على النار أو هنعصره، وبعد كده ناخد الناتج ونبدأ نعمل منه ماسكات للشعر بأشكال مختلفة.
عصير البقدونس
هنقطع البقدونس قطع صغيرة، ونحطّه في الخلاط مع شوية ميه بسيطة، ونضربه في الخلاط أو نهرسه بالكبة لحد ما يبقى ناعم أوي.

إضغط لمشاهدة الفيديو:
لوسيون البقدونس للشعر
المكونات:
1/ 2 كوب ميه سخنة
حزمة بقدونس
الطريقة:
هنقطع البقدونس قطع كبيرة، ونحطّه مع الميه السخنة في حلة على النار، ونسيبه يغلي لمدة من 15 : 20 دقيقة، وبعد ما البقدونس يغلي كويس أوي هنصفّيه، وبعدين ناخد اللوسيون نستخدمه في الماسكات.
اللوسيون ده نقدر نستخدمه على الشعر لوحده بدون أي إضافات، بعد ما نغسل شعرنا هنشطف الشعر باللوسيون ده، ونسيبه لمدة من 10 : 15 دقيقة فقط، وبعدين نشطفه بالميه، مع الاستمرار عليه هيدّي للشعر النضارة والصحة واللمعان.
البقدونس للشعر الدهني
المقادير:
1/ 2 كوب لوسيون البقدونس
ملعقة متوسطة عسل نحل
قطرات ليمون
الطريقة:
هندوّب العسل مع مية البقدونس كويس، وهنستخدم الماسك ده لجذور الشعر، وكمان للشعر نفسه، ولكن بطريقة مختلفة.
هنقسّم الكمية دي لجزأين؛ أول كمية هنضيف عليها قطرات عصير الليمون، ونحطّها على جذور الشعر، وده علشان الليمون بيساعد على لمعان الشعر، وكمان لو فيه قشرة بيشيلها، وبيخلي فروة الرأس نظيفة بدون قشرة، أما الكمية الباقية من الماسك هنحطّها على الشعر نفسه بدون إضافة الليمون؛ لأن الليمون بينشف الشعر شوية وعلشان كده هنكتفي باللوسيون مع العسل فقط.
هنسيب الماسكات على شعرنا لمدة من 20 : 30 دقيقة، وبعدين نشطفه كويس.

إضغط لمشاهدة الفيديو:
ماسك القرنفل واللافندر للشعر
المكونات:
3 ملاعق صغيرة زيت خروع
ملعقة صغيرة زيت قرنفل
ملعقة صغيرة زيت لافندر
الطريقة:
هنخلط الزيوت مع بعض كويس أوي، وبعد التقليب هيبقى الخليط لون أبيض شفاف أقرب للون زيت جوز الهند، وده علشان تتأكّدوا إن الزيوت المستخدمة أصلية مش مغشوشة.
هنحط من الخليط ده على شعر مغسول من عند الجذور ولحد الأطراف، وبعدين نحط بونيه بلاستيك، ونلف فوطة سخنة أوي على شعرنا؛ وده لأن زيت الخروع من الزيوت التقيلة اللي بتحتاج لتدفئة.
هنسيب الماسك لمدة من 20 : 25 دقيقة، وبعدين نغسل شعرنا بالشامبو.
لما نعمل الماسك ده هنحس بنتيجة هايلة من أول مرة؛ لأنه بيحتوي على زيت الخروع، وده بيتقل الشعر جدا وبيغذّيه، وكمان الماسك ده بيعطّر الشعر جدا.

إضغط لمشاهدة الفيديو:
خلصت حلقتنا النهارده..
استنونا في الحلقة الجاية اللي هارد فيها على بعض أسئلتكم..
وكمان هاقول لكل الأمهات نصايح للعناية بالأطفال..
سلام،،،
*********************
للرجوع للحلقات السابقة
اضغط هنا "جمالك من الطبيعة مع رانيا"
*********************