شوربة لسان العصفور بالشوفان على "سفرة دايمة"

النهارده وصفتنا خفيفة وسريعة ومتكاملة العناصر الغذائية، هتكون عبارة عن شوربة لسان العصفور بالشوفان، ممكن كل اللي بيعملوا ريجيم يعملوا الشوربة دي؛ خاصة إن فيها بقدونس؛ والمعروف إنه بيساعد في حرق الدهون، جرّبوها وقولوا لنا رأيكم فيها.
شوربة لسان عصفور بالشوفان
المقادير:
* 1/ 2 كيلو صدور فراخ
* 2 حبة بصل مفرومين
* 2 ملعقة كبيرة صلصة طماطم
* 3 ملاعق كبيرة لسان عصفور
* 3 ملاعق نعناع فريش مفروم
* 1/ 4 حزمة كرفس مفروم
* 3 ملاعق كبيرة بقدونس
* 4 ملاعق كبيرة شوفان
* 1/ 2 ملعقة صغيرة قرفة
* ملعقة صغيرة بابريكا
* 2 ملعقة كبيرة زيت
* ملح وفلفل
الطريقة:
1- قطّعي الصدور لمكعبات صغيرة، وافرمي البصل وشوحيهم مع بعض في الزيت لحد ما البصل يدبل، وبعدين تبّليهم بالملح والفلفل والقرفة والبابريكا.
2- حُطّي الكرفس والنعناع المفروم والبقدونس وقلّبيهم كويس، وسبيهم على نار هادية لمدة 20 دقيقة.
3- بعد كده حُطّي الصلصة والمية وقلبيهم لحد ما الصلصة تمتزج كويس، وسبيهم لحد ما الشوربة تغلي.
4- حمري لسان العصفور، وحطيه في الشوربة مع الشوفان، وغطي الحلة وسبيها على النار لمدة 10 دقائق؛ لحد ما تحسي إن لسان العصفور بدأ يستوي، وبعدين اطفي وسبيه يكمّل سواه في حرارة الشوربة.
5- عند التقديم زيّنيها بالنعناع وعصير الليمون وقدميها.. بالهنا والشفا.
ملحوظة: ممكن تحطي الخضروات اللي أنت عايزاها، وبكده تبقى متكاملة العناصر الغذائية.
خلصت وصفتنا النهارده..
استنونا مع وصفة جديدة..
وابعتوا لنا كل طلباتكم على "سفرة دايمة"..
سلام،،،