أنا مرتبطة بواحد دايما بيغير عليّ بطريقة فظيعة، ومابيخلنيش أخرج إلا للشديد القوي، وكل ما نتخانق ألاقيه بيقول لي كلام عمري ما سمعته من حد إلا من صاحبتي اللي طلعت مش كويسة وبتهددني، وبيقول لي: أنا هاعرّفك تعملي فيّ كده إزاي، وهاقول لوالدتك إنك بتكلميني، وكل رسايلك هاوريها لها.. طبعًا بعد ما بنتصالح يقول لي: كنت متنرفز، وعمري ما هاعمل كده.. وكل ما نتخانق لازم يشتمني، وطبعًا لازم أردّ عليه، ألاقيه يتنرفز أكتر. باختصار بيحبني حب امتلاك، مش عايزني أعمل حاجة غير إني أحبه وأقعد في البيت بس، ولو عملت غير كده يبقى بخناق.. ودلوقتي إحنا انفصلنا وأنا اللي أنهيت الموضوع علشان قال لي: يا أنا يا أصحابك، قلت له: طب بعدين نتكلم علشان متنرفزين، وكنت خايفة أقول حاجة أندم عليها؛ لقيته فِهِم إني بِعته، وقال لي: إنه هيقول لماما، والكلام ده تاني.. هو طبعا كان بيتكلم بس علشان متنرفز.
المهم أنا سِبته علشان بيقول لي الكلام ده، وقلت له إني مش حاسة معاه بالأمان، وبقيت خايفة منه.. كلم صاحبتي، وقال لها: إني بعته وفضّلت أصحابي؛ ففهّمته الصح، وبرضه بِعِدنا عن بعض.
أنا مش عارفة أعمل إيه؟ بحبه ومش قادرة أبعد، وفي نفس الوقت قسيت عليه أوي، ومش قادرة أرجع له؛ علشان الكلام اللي بيقوله ده.. أنا عمري ما شُفت واحد بيحب واحدة يقول لها الكلام ده.. أنا محتارة يا جماعة، يا ريت تقولوا لي أعمل إيه.