ما فيش غير ده

أحب أشكر أسرة "بص وطل" على المجهود الرائع. بس أنا عندي مشكلة ونفسي حد يحلها لي لأني خلاص كرهت كل حياتي. أنا فتاة عندي 22 سنة، أنا كنت باتكلم مع واحد على النت، واتعرفت عليه، كانت معرفة عادية في البداية؛ بس هو طلب مني إني أنزل أشوفه، وفعلا نزلت وشفته.
هو إنسان كويس ومحترم جدا وأنا حبيته جدا، وهو كمان حبني، وفضلنا نتكلم مع بعض على النت وعلى التليفون؛ لدرجة إني كنت باحس إنه معايا طول اليوم، وهو إنسان فيه كل حاجة أنا بحلم بيها؛ بيغير علي ويخاف علي ومهتم بي جدا.
لكن المشكلة إن فيه قريب طلب يخطبني. أنا كنت مخنوقة جدا، وفضلت أعيط وأقول لا واتصلت بحبيبي علشان أقول له على اللي حصل؛ حبيبي انهار طبعا وما صدقش وقال لي أرفضه.
مع العلم إن حبيي طلب يشوف ماما وشافها وكلمها وحكى لها على ظروفه وقال لها: أنا بس أشتغل شغلانة ثابتة وآجي، يعني هي عارفاه؛ بس لما جه قريبي ده اتغيرت كل حاجة وبقت ماما بتقول لي: ما فيش غير ده اللى هتخديه، وبابا كمان لدرجة إني ما بقتش عارفة أعمل حاجة.
أنا من كتر ضغط أمي وبابا حاسة إني عايشة ومش عايشة أنا تعبانة أوي. وخطيبي طبعا وحش جدا وباقارن بينه وبين حبيبي؛ خطيبي ولا بيغير علي ولا بيخاف علي ولا باحس معاه بالحب اللي باحسه مع حبيبي خالص؛ فأرجوكم أعمل إيه؟ ردوا علي علشان هاين عليّ أموت نفسي.
وسام