سجن "9" للرجال

أحكي هنا حكاية غرفة حجز صغيرة بقسم شرطة الهرم شهدت مأساه حقيقية عاشها عائل اسرة لمجرد انه دخل في مشكلة مع زوج ابنته الذي يعمل ظابط بالقوات المسلحة .. مأساة توضح الي اي مدي وصلنا اليه من انحدار الاخلاق .. مأساة توضح ما ألت اليه مصرنا من تجبر اصحاب السلطة .. مأساة تكشف ان المواطن العادي لا يساوي مقدار بعوضه اذا اوقعه حظه العاثر في مواجهة باشا من بشوات الزمن الجديد .. لن اطيل عليك عزيزي القارئ وساتركك مع القصة التي يحكيها نجل المظلوم .
التاريخ:2-فبراير-2014
التهمة: حيازة سلاح ألى وشروع قتل
المتهم: محمد صفوت اأمين "أبويا"
المدعي: جوز أختى شادى يسرى شاكر – نقيب جيش سلاح المدرعات..
صفة المتهم: مهندس عمره 65 سنة..
رقم المحضر:1355 إدارى قسم الهرم
القصة: خلاف زوجى عادى ووصلت أختى لقرار إنها مش قادرة تعيش مع الشخص ده وطلبت الطلاق، طبعا الباشا مينفعش يطلب منه الطلاق إرجعى بيتك عشان مجيبكيش بالعافية.. أبويا قاله تجيبها إزاى بالعافية هى مش عايزة تعيش معاك.. اتصل بيها وقالها انا هعرف أجيبك إزاى.. لحد هنا عادى
الجزء الجاى ده مش فيلم هندى لا ده واقع حقيقى والصورة اللى انا مصورها دى مصورها بموبايلى الشخصى والراجل اللى هو ابويا واللى عنده 65 سنة موجود فى الحجز ده..
فجر يوم الأحد اتصل بواب عمارة أختى بيها قالها حصل إطلاق نار فى شقتك وبابا وماما نايمين صحيوا مخدودين..اول حاجة فكروا فيها انهم يروحوا قسم الهرم اول ما راحوا القسم بابا اتمسك..فيه ايه ياجماعة؟ انت معمول ضدك محضر اعتداء بضرب النار هنا ابتدى السيناريو..ابويا اتحول نيابة اول يوم لنيابة اكتوبر..ظابط الجيش راح هناك وقعد مع وكيل النيابة بالساعات وخلاه يتحامل على بابا جدا ومن الأخر قاله اعمل معاه الواجب..اللى بيفهم قانون هيعرف ان محضر إدارى ومع راجل عنده 65 سنة وعنده صفة بيتعمله إخلاء سبيل بضمان محل إقامته..لا وكيل النيابة إداله استمرار حبس بلا اى أدلة تدين ابويا او شهود شافوا ابويا..ضرب النار حصل فعلا عشان هو (جوز أختى) كان متفق مع ناس يضربوا نار ويضرب نار وكله على الباب وقال ايه وهما بيضربوا بيقولوا لازم تطلق….
يعنى ابويا جاب ناس وضرب نار بنفسه وهو عنده 65 سنة وبعدين نزل وضرب نار من تحت وشافوا من البلكونة وهو بيضرب وظابط الجيش بطل الرماية ولا قبض عليه ولا ضربه بالنار ده كلام المحضر هو خرج منه طلقة فى الباب بس…
طبعا نقيب الجيش دخل قعد بالساعات مع وكيل النيابة وحصل تعسف غريب ومبيسمعش حد والمحامى انسحب للتحامل المهم انه ادى استمرار حبس بلا اى ادلة على وجود ابويا اصلا…
تانى يوم عرض نيابة فى أكتوبر نفس وكيل النيابة اداله استمرار حبس اربع ايام بلا اى ادلة والظابط بيجيله وبيدخل يقعد بالساعة معاه فى مكتبه…
إمبارح اتعرض على قاضى جزئى فى نيابة اكتوبر خد اخلاء سبيل لعدم وجود اى ادلة والمحضر ملوش لازمة بعد ما مشينا والمفروض اتأكدت ان النيابة مش هتستأنف شكله اتصل بيه وأتأكدنا انه جاله بعد ما مشينا وقاله لازم تستأنف راح عمل إستئناف عشان يتحبس تانى…النهاردة بتتعرض على نيابة الجيزة قدام قضاة برده…أنا طبعا حاسس انى عايش فيلم بس الظلم بيقوى أول يوم شفت ابويا خارج من الحجز جالى انهيار عياط مش مصدق ده سندى فى الدنيا عملنا ايه عشان الظلم والأفتراء ده…تانى يوم فى النيابة كنت واقف حاسس ان راسى واصلة السما حاسس ام انا قوى بربنا كنت ماشى فى النيابة مبتسم…
و ف وسط ده كله، نقيب الجيش (جوز أختي) وقف مع المحامي وقاله: "والله لو رجعت بيتها الموضوع ده هيخلص في ساعة"