! خطيبي بيتحكم فيا

السلام عليكم ورحمة الله وبركاته.. أنا مخطوبة بقالي سنة و6 شهور عن حب الحمد لله، وخطيبي بيسافر الكويت بيشتغل علشان يجيب الشقة بس بنتواصل على النت.
المشكلة اللي عندي أنه في أول الخطوبة حصلت مشكلات بينا كتير، ودي حاجة طبيعية في الأول لإنه عصبي جدا، بس أنا الحمد لله هادية فبامتص عصبيته دي، وماباردش لحد ما يهدى لأني بحبه.
بس بعد ما اتعرفنا على بعض أكتر بقينا متفاهمين، وزاد حبنا أكتر من الأول وهو كان بيثق فيّ جدا، ماكانش بيعارضني أما كنت بانزل في أي مكان، وأختي الكبيرة كمان اتخطبت برضه في نفس وقت خطوبتي تقريبا..
وهو بعد ما اتعرف علينا أكتر وعلى مشكلاتنا، عرف إن خطيبها مابينزلهاش في أي مكان خالص ولا حتى تروح لقرايبنا، وهي بتستحمل وبتسمع الكلام علشان بتحبه.. فلما خطيبي شاف كده بدأ يعمل زيه؛ علشان يعرف إذا كنت هاسمع كلامه ولا لأ.
وبقت بتحصل ما بينا مشكلات علشان أنا ساعات باعارضه لما يطلب مني أعمل حاجة وأنا شايفة إنها غلط، أو ماكانش بيعارض فيها الأول وأنا حاسة إنه بقى بيتحكم فيّ زيادة، مش علشان هو كده؛ لأ علشان يبقى زيه، ويعرف إذا كنت هاسمع كلامه في كل حاجة زي أختي ولا لأ، وأنا والله مش قصدي ماسمعش كلامه أو أعاند معاه، أنا بس ماكنتش متعودة منه في الأول على الطريقة دي وكمان مابحبهاش..
وأنا دلوقتي بحبه وعارفة أنه بيحبني بس خايفة لحسن المشكلات دي تنهي علاقتنا لأنه عنيد جدا، وأنا ساعات باعند لما بالاقيه كده، وعايزة حل يحافظ على حبنا وعلى علاقتنا.
أرجوك اديني رأيك..
صديقتنا العزيزة
نعتذر عن التأخر في الرد
أختي ! ان يكون خطيبك في الاول مش متحكم فيكي ودلوقتي بقي متحكم . دي نقطه لازم تتكلمي معاه فيها . و تقوليلوا ان لو كان تحكمك ده لصالحي و انا مقتنعه بكده انا اكييد هوافقك الرأي . لكن التحكم لمجرد التحكم يبقي كده انت بتلغي شخصيتي
و فتره الخطوبه دي يبقي الطرفين يتعودوا علي بعض فيها وان في فتره الخطوبه المسئول ان يتحكم فيكي تنزلي و لا لأ او يتحكموا في تصرفاتك هما اهللك ، وبردوا هو يعرف انتي هتنزلي ولا لأ و تصرفاتك ازاي و بقولك وجهه نظره و انتي عليكي يا تقبلي ان كنتي مقتنعه يا ترفضي لو كنتي مش مقتنفه و تبرري ليه سبب رفضك بهدوء . و يارب يكون ده حل مناسب ليكي .