نفسي أشتغل بس مش لاقي شغل!

السلام عليكم .. بحييكم في أول كلامي علي المجهود الرائع ده:
أنا شاب حديث التخرج 22 سنة، خريج تجاره بتقدير جيد، ولكن لم أحصل علي أى وظيفة، وده تاعبني أوووووى، نفسي أشتغل بس مفيش شغل، ولو فيه مش بيناسبني ومينفعش اشتغله، واتخنقت حاسس اني مليش قيمة فى الحياة ابدًا، بأخد كورسات كمبيوتر، ولكن أنا حاسس إن مفيش أمل،، مخنووووووووووووق جداااااااااااااا كل زمايلي اشتغلوا، وأنا قاعد لسه بأخد المصروف من أهلي، وده خانقني أووووى يعني لو فيه حاجه عايز اعملها بقولهم هاتوا فلوس، لو هما رافضنها يبقي خلاص نفسي اصرف علي نفسي، واعمل اللي أنا عايزو مليش شخصية جوا بيتي بيفرضوا رأيهم عليا فب أي حاجه، مهما اقعد مع ناس أو أهزر بحس إني مخنوق ووحيد، مع ان لي أصحاب واخوات وناس بيحبوني بس اغلب الوقت وحييييييييييييييد يمكن عشان مش مرتبط بس وأنا ارتبط ليه، وانا عارف ان مش هقدر أكون ليها، لاني مش قادر أصرف علي نفسي حتي الوضع ده مخليني بتمني المووووووووت مع اني عارف اني لو مت هروح النار عدل مفهاش كلام أنا بشرب سجاير أوقات بشيش دايما بشرب حشيش أحيانا، بعمل كل حاجه تخلي ربنا مش راضي عني، ومش قادر أعمل حاجه تخلي ربنا راضي عني حتي الصلاه مش بصليها حاسس اني ضايع وحاسس اني قربت اموووووووووووووت افيدوني انتو كل مره بتقولولي وبستفاد جدا من كلامكو بس والله انا مش وحش انا بالعكس كويس والله.
صديقنا العزيز
نعتذر عن التأخر فى الرد
ومن الواضح إن فى شغالانه معينة فى دماغك عاوز تشتغلها .. مرتب حلو .. الجو العام 100 % .. بس للأسف إنك تحلم بوظيفة معينه مش كفاية، ياريت بدل ما تحلم بالوظيفة اللى مشتغلتهاش، وتحلم بالعربية اللى مركبتهاش، و فى الشقة اللى لسه مجبتهاش، و تفكر فى الموت، و فى حظك السئ لازم تفكر بطريقه عملية :-
أولًا :شوف الوظيفة اللي إنت نفسك تشتغل فيها عاوزة مؤهلات عاملة إزاى، و ابتدى اشتغل عليها، لو الوظيفة عاوزه لغة وإنت ضعيف فى اللغة و كمان المسأله المادية مش مساعده انك تأخد كورسات فى مكان جيد ممكن تنزل من الانترنت كورسات وتدرب نفسك عليها.
ثانيًا: لو الوظيفة محتاجة خبرة و انت معندكش خبرة، انزل اى شغل ( حتى لو مش بتحبه أو فلوسه قليلة )، لان ده هيثقلك و هتكتسب مهارة العمل تحت ضغط والاحتكاك بالناس وهتبقى المجالات قدامك أوسع فى إنك تلاقي فرص شغل أفضل وفي مجالك.
ثالثًا: شوف المجال اللي انت عاوز تشتغل فيه و ابتدى اقرأ عنه و ادرسه .. و ركز كل تفكيرك فيه .. و لو عرفت اشتغل فى حاجة متعلقة بيه مهما كانت تافهة .. لحد ما تقدر توصل للوظيفة اللى انت عاوزها.
لازم تصبر وباذن الله هتلاقيها فتحت عليك من وسع .. صدقني الصبر هو مفتاح الفرج زي مابيقولو وعن تجربة.. وكمان الرزق.. كمان فلوس وبس (يقول الشيخ الشعراوي المال رزق والصحة رزق .. والأمن رزق والسعادة النفسية رزق والزواج رزق…) فانظر رزق الله واحمده و كن علي يقين من انك هتشتغل باذن الله ومتخافش ولا تقلق كله في معاده انشاء الله
وَمَا مِن دَابَّةٍ فِي 0لأرْضِ إِلاَّ عَلَى 0للَّهِ رِزْقُهَا وَيَعْلَمُ مُسْتَقَرَّهَا وَمُسْتَوْدَعَهَا كُلٌّ فِى كِتَابٍ مُّبِينٍ [هود:6]
، ويقول رسول الله صلى الله عليه وسلم: ((إن أحدكم يجمع خلقه في بطن أمه أربعين يوماً، ثم يكون علقة مثل ذلك ثم يكون مضغة مثل ذلك، ثم يبعث الله إليه ملكاً، ويؤمر بأربع كلمات، ويقال له، اكتب عمله و رزقه وأجله، وشقي أو سعيد ثمُ ينفخ فيه الروح)) .
رزقك مش هيضيع إن شاء الله وكل شئ بأوان وان شيئا قدره الله لك فلن يخطئك