خطيبي بيرقص ويسكر ويصاحب بنات.. وأهلي بيقولوا خليه يروّق دماغه!!

السلام عليكم ورحمة الله وبركاته.. أنا محتاجة حل لمشكلتي، ويا ريت تريّحوني لأني حقيقي حاسة إن عقلي وقف عن التفكير.
أنا مخطوبة، وخطيبي مسافر بره وعنده 29 سنة، وبيحبني جداً، وأنا كمان باموت فيه، وبعت لأخويا وأخده يشتغل معاه هناك، ولما راح حصلت مشاكل كتير، وطبعاً عرفت اللي هو مش بيقول لي عليه؛ إنه بيسهر في الديسكو، وبيرقص مع بنات، وبيشرب ويسكي.
بس أنا مش مصدّقة أخويا، وهو بيحلف لي إنه كان معاه في مرة وقتها.. بس هو ما قاليش حاجة إلا لما حصلت مشاكل، ودلوقتي بيخيّرني بينه وبين خطيبي؛ وبيقول لي: يا أنا يا هو، ولو اخترتيه مش هاعرفك.
ولما أهلي عرفوا الموضوع قالوا لي: ده حقه يعمل اللي هو عايزه عشان إنتِ لسه مش مراته، وده شاب وفي غربة، وقدامه البنات عرايا على طول؛ فإنتِ ماتحكميش عليه في حاجة زي دي غير لما تكوني مراته.. يعني رأيهم إنه شاب وليه رغباته الجنسية؛ فبيروح يروّق دماغه شوية، وإنتِ مش من حقك تحاسبيه دلوقتي.
أنا محتارة جداً، ومش عارفة أعمل إيه؛ فيا ريت حد يشاركني التفكير في المشكلة دي من فضلكم.
N.M


وعليك السلام ورحمة الله وبركاته صديقة "بص وطل" العزيزة.. مشكلتك هي مشكلة كلام نَقَلَه أخوك بعدما غضب من خطيبك ورجع من غير ما يكمّل شغل، ولو كان أخوك لسه في السفر مع خطيبك وماحصلش الزعل اللي رجع بسببه؛ كان زمان أخوك سهران في الديسكو يشرب الخمر ويروّق دماغه بكل اللي ينفع للروقان.
يعني كلام أخوك ده محتاج وقفة، وتعرفي ليه أفشى سرّ خطيبك، وليه بيهددك بالقطيعة ولو شافك في الشارع هيعمل مايعرفكيش؟ يا ترى عشان صحيح خطيبك بيشرب وبيسكر، ولا عشان هو غضبان وعاوز يلبّس خطيبك تهمة والسلام؟
ولو خطيبك فعلاً وحش كده، مش كان المفروض إن أخوك يلحقك أول ما يعرف الحاجات دي؛ بدل ما تتورطي في جوازة مع شخص منفلت عديم الدين والمسئولية؟!
وتفتكري صحيح كلام أهلك إن الشاب حرّ قبل الجواز وهو لابس دبلة واحدة عشان يتزوجوا؟ يعني من حق الخطيب يعمل اللي نِفسه فيه ويروّق نَفسه، ولما تبقي مراته تبقي تحاسبيه؟ وهل ده معناه إن إنتِ كمان حرة وممكن تعملي أي حاجة، ولما يبقى زوجك يبقى يحاسبك؟!
ولا كلام أهلك كان عشان مايطلّعوش أخوك كذاب، ويبقى مسكوا العصاية من النص؛ آهو أنت تفضلي خطيبة خطيبك اللي بيروّق نفسه في الديسكو، وأخوك مش كذاب وبيتبلّى على خطيبك بالكذب؟
كما إنه لو حسبناها بالعقل، هنلاقي إن لو خطيبك صحيح بيعمل كده كان إيه اللي يخليه يأخد أخوك معاه عشان يفتن عليه في أول مناسبة زي ما عمل بالفعل؟! ولو إنت كنت مكان خطيبك ده، كنت أخدتِ أخو خطيبك يشتغل وياكل لقمة عيش عشان يفضحه ويعرف سره؟ مش العقل بيقول كان فضل في بلده أحسن ويخلّي الطابق مستور.
صديقتي العزيزة.. ديننا الحنيف يأمرنا بالتبيّن من الحقيقة حتى ولو كانت من مصدر موثوق؛ حتى يتبين لنا الحق من الباطل؛ لذا وجب عليك التأكّد من قول أخيك، وبلّغيه إنك هتسألي خطيبك، وشوفي ردّ فعله، وبعد كده اسألي خطيبك دون غضب ولا خناق عن اللي قاله أخوك، واسمعي منه بعقلك قبل قلبك، وأنا متأكدة إنك هتعرفي من طريقة كلامه صدقه من كذبة.. ثم قرري بعد ذلك لنفسك؛ فإن كان هناك شبهة أنه يفعل ذلك ودبلتك في إيده؛ فلا تأمنيه؛ لأن اللي فيه داء مش بيطلع إلا مع روحه.
وإن كان صادق، والمسألة ديسكو ومزيكا عشان يقتل ملل الغربة والوحدة؛ فقولي له إن هذه الأماكن بيوت لشياطين الجن والإنس، وبلاش تمكّنهم منك عشان ربنا يبارك لك في صحتك وفي ذريتك.. إلخ.
تأكّدي صديقتي مما قال أخوك، ولا تتركي نفسك للي قال واللي عاد، وكل واحد له دماغه، ولا تنسي أن المسألة متعلقة بمستقبلك أنت مش حد غيرك.

لو عايز تفضفض لنا دوس هنا