بدل المرة اثنين

أنا والحمد لله بنت متدينة وقبل ما باعمل حاجة بافكر بعقلي وديني، أنا عمري ما مريت بعلاقة حب لغاية ما دخلت الجامعة وفي أول سنة في الدراسة حاول شاب إنه يكلمني كثير وأنا رفضت المبدأ، بس هو حاول يلفت انتباهي وكان جريء أوي، المهم أنا في الأول ما كنتش مرتاحة له، وبعد مرور الوقت حسيت إنه شغلني. وحبينا بعض؛ بس كنت عاملة حدود لحبنا إنه يكون في الجامعة بس أو الموبايل، وقعدنا مرتبطين 6 سنين، وفي مرة كلم بابا في التلفون وبابا رفضه لأنه كان بيدرس لسه، وبعد كده جاء له تاني وكان مخلّص وعنده شقة في العبور وبابا برده رفضه علشان هو شغله ما كانش كويس بمعني أصح مرتبه ما يعيّش اثنين؛ بس أنا كنت رغم كل ده عاوزاه.
دلوقتي هو مش عاوزني خلاص، حاولت أقول له: إني لسه معاك ومش هاسيبك وإنت تقدر تحسن من دخلك. ما سألش فيّ وقال لي: إنه عمل اللي عليه والمفروض إني أقف أمام والدي وأقول له: إني أنا عاوزاه حتى لو والدي مش موافق أنا عاوزاه.
أسأل سؤال: فيه إنسان ممكن يحب كل الفترة دي، ولما يتقدم لأهل البنت اللي بيحبها ويرفضوه مرة يزعل ويسيبها وينسى كل حاجه ويقول أنا عملت اللي عليّ؟ مع إني لسه ما اتخطبتش ولا فيه أي حد في حياتي غيره، ومش عاوزة غيره، وقلت له كده، وبرده هو نسي كل حاجة. أنا مش عارفة أعمل إيه؟ وهل المفروض إني أقف أمام والدي وأقول له إني عاوزاه حتى لو والدي رفضه؟
z