عزومة 16 رمضان مع الشيف "يسري"

زي ما وعدناكم إننا كل أسبوع هنقدّم لكم عزومة مميزة جداً مع الشيف "يسري"...
النهارده هنشوف مع بعض فكرة لوجبة جديدة ممكن إنك تعمليها لأسرتك أو تعمليها لما يكون عندك عزومة...
وعلى فكرة الوجبة اللي معانا النهارده بالرغم من إنها جديدة إلا أن مقاديرها بسيطة جداً وفي متناول الجميع..
يلّا نشوف مع بعض الشيف "يسري" هيعمل لنا إيه؟!!
شوربة "كريم دوفلاي"
المقادير:
* 5 أكوب شوربة فراخ
* صدور فراخ مخلية ومقطعة قطع صغيرة
* بصلة مقطعة قطع صغيرة
* 100 جرام مشروم
* 4 ملاعق دقيق
* 6 ملاعق زبدة
* كوب كريمة
* مرقة دجاج

الطريقة:
1- هبتدي أقطع المشروم إلى مكعبات صغيرة بعد غسيله كويس.
2- بعد كده هاحط طاسة وحلة على النار، وهاحط ملعقتين زبدة في الطاسة، و4 ملاعق زبدة في الحلة، بعد كده هجيب بصلة صغيرة وهاحطها في الطاسة اللي فيها ملعقتين الزبدة، وهاحط 4 ملاعق دقيق في الحلة اللي فيها ال4 ملاعق زبدة وهقلبهم مع بعض لغاية ما الدقيق يبقى لونه ذهبي.
3- بعد ما الدقيق يبقى لونه ذهبي هضيف إليه شوربة الفراخ كلها مع التقليب المستمر، وفي نفس الوقت هجيب صدور الفراخ وأضعها على البصلة والزبدة اللي في الطاسة، وأقلبهم لحد ما يستووا وهضيف إليهم شوية ملح وفلفل وممكن نزوّد شوية شوربة على الفراخ.. بعد كده هضيف المشروم للفراخ وهسيبهم يستووا مع بعض.
4- بعد ما الفراخ والمشروم يستووا، هاحطهم في الحلة اللي فيها الشوربة والزبدة والدقيق، وبعد كده هضيف في الآخر كوب الكريمة مع شوية ملح وفلفل، وأول ما يغلوا أطفي البوتاجاز وأغرف الشوربة في طبق التقديم.. وبالهنا والشفا.

إضغط لمشاهدة الفيديو:
سلطة الطماطم بالريحان والموتزاريللا
المقادير:
* 1/2 كيلو جبنة موتزاريللا مقطعة شرائح
* 1/2 كيلو طماطم مقطعة شرائح
* 4 ملاعق زيت زيتون أو عادي
* ملعقتين ريحان أخضر مفروم
* 2 ملعقة خل
* 4 ملاعق زيت
* مسطردة
* ملح وفلفل
الطريقة:
1- في البداية هحضّر الصوص، وهو عبارة عن خليط من الخل والمسطردة والملح والزيت، باحطهم على بعض وهقلّبهم كلهم مع بعض، وبعد كده هضيف إليهم الجبنة الموتزاريللا والريحان المفروم.
2- ممكن علشان أحصل على اللون الأخضر الغامق للريحان المفروم إني أسلق الريحان، وبعد كده أشيله من المية السخنة وأحطه في المية الباردة وبعد كده أضربه في الخلاط.
3- بعد كده هجيب الطبق بتاع السلطة وابتدي أحط شرائح الطماطم وشرائح الجبنة بشكل متناسق وأضع عليهم الصوص اللي أنا عملته.. وبالهنا والشفا.

إضغط لمشاهدة الفيديو:
شاورمة على الطريقة التركي
المقادير:
* كيلو شرائح فيليه كندوز
* شرائح من اللية الضاني "علشان تديها طعم"
* بصل مقطع مكعبات
* 2 ملعقة بهارات
* 1/2 كوب خل
* ملح وفلفل
الطريقة:
1- هحط شرائح اللحمة في حلة "بايريكس" وهتبّلها بالملح والفلفل والبهارات وهاحط عليهم البصل.
2- بعد كده أنزل عليها شرائح اللية علشان تعطي رائحة وطعم حلو وبعد كده هادخلها الفرن.
3- بعد ما تخرج من الفرن نشيل اللية من عليها.
4- بعد كده هجيب طاسة وهاحط فيها الزيت والشاورمة اللي خرجت من الفرن واقلبهم مع بعض، وبعدين نجيب العيش الشامي الكبير وندهنه بسلطة الطحينة ونحشيه بالشاورمة ونقفل رغيف العيش كويس.
5- بعد كده هاجيب طاسة وأدهنها زبدة وهاحطها على النار وهاحط الرغيف في الطاسة لغاية ظهره ما يحمرّ، وبعد كده أقلّبه على الناحية التانية.
6- بعد كده أجيب طبق التقديم وأقطّع الرغيف لنصفين وأزينه بالبقدونس والطماطم.. وبالهنا والشفا.

إضغط لمشاهدة الفيديو:
فتة المكدوس
المقادير:
* 1/2 كيلو لحمة مفرومة
* كوب زبادي مضاف إليه نصف فص ثوم مفروم وذرة ملح
* 3 رغيف عيش شامي محمص ومقطع قطع صغيرة
* 2 بصلة مقطعة قطع صغيرة
* 1/2 كوب صنوبر محمص
* 1/2 كيلو طماطم
* فص ثوم مدقوق
الطريقة:
1- هجيب طاسة فيها زيت وهاحط فيها البصل والثوم ونشوحهم مع بعض لمدة خمس دقائق وبعد كده أضيف إليهم اللحمة وأقلبهم مع بعض.
2- بعد كده هجيب الطماطم وهقطعها لقطع صغيرة وأضربها في الخلاط.
3- بعد ما اللحمة تبدأ في السوى أضيف إليها البهارات والملح والفلفل وعصير الطماطم، وأسيبهم مع بعض لمدة ربع ساعة.
4- أثناء ما اللحمة على النار بتستوي، هجيب طاسة وهاحط فيها زيت غزير وأسيبه على النار لغاية ما يسخن، وبعد كده هضيف إليه العيش وأسيبه لمدة عشر دقائق.
5- وبعد كده أطفي البوتاجاز وأصفي العيش من الزيت.
6- وبكده بقى عندي كل مكونات الفتة جاهزة، وابدأ أحطها في طبق التقديم، بإني أحط العيش في نص الطبق بحيث إنه يكون على شكل هرمي، وبعد كده أحط اللحمة وأحط الزبادي من فوق اللحمة بحيث إنه يغطيها كلها ومن فوقها هاحط الصنوبر.. وبالهنا والشفا.

إضغط لمشاهدة الفيديو:
الكريم كراميل
المقادير:
* 4 بيضات
* صفار بيضتين
* 2 كوب لبن دافي
* كوب سكر
* فانيليا
الطريقة:
1- أول حاجة هعملها هي الكراميل، وهو عبارة عن ملعقتين من السكر وباحطهم في طاسة على النار، وأقلبهم لحد ما السكر يسيح ويكوّن الصوص.
2- بعد كده أضع الصوص ده في القالب المخصص للكراميل وأسيبه علشان يبرد شوية، وبعد كده هاحط اللبن علشان يدفى على النار "مش يسخن".
3- أبدأ أضرب ال4 بيضات وصفار البيضتين وأضيف معاهم كمية السكر المتبقية وهي 3/4 كوب وبضيف كمان الفانيليا، وأضربهم مع بعض كويس، وآخر حاجة هضيفها على البيض هي اللبن الدافي، وآخد بالي وأنا بضيف اللبن إني أقلب الخليط كويس أوي علشان يتجانس مع بعضه.
3- بعد كده أجيب منديل وأحطه على وش الخليط اللي عملته علشان أشيل الرغاوي، وبعدين أجيب مصفاة وأصفي الخليط على قالب الكراميل.
4- بعد كده أدخل قالب الكريم كراميل الفرن على حمام مائي وده بأعمله بإني أحط شوية مية سخنة في صاج الفرن وأحط قالب الكريم كراميل على الصاج وأدخله في الفرن، ولما يستوي أطلعه من الفرن وأقلبه في طبق التقديم، وأزين الطبق بشرائح الموز المرشوش عليها عصير ليمون.. وبالهنا والشفا.

إضغط لمشاهدة الفيديو:

وبكده تكوني جهزتي لأسرتك وجبة فطار لذيدة وسهلة..
وفي انتظار آرائكم وأسئلتكم..
ونشوفكم على خير الأسبوع القادم...
مع وجبة جديدة ولذيذة،،،
*********************
للتعرف على مزيد من الوصفات الشهية
اضغط هنا "سفرة دايمة"
*********************