عزومة 10 رمضان

عصير الليمون بالنعناع
العصير ده منعش ولذيذ جداً في الصيف..
المقادير:
* كوب مية كبير
* 1/4 كوب عصير ليمون
* 3 معالق سكر
* 10 ورقات نعناع كبيرة مفرومة
* أوراق نعناع "للتزين"
* شرائح ليمون"للتزين"
* مكعبات تلج
الطريقة:
1- اخلطي كل المقادير دي مع بعض، وبعد كده اضربيها في الخلاط.
2- صفّي العصير وصبيه في كوبايات العصير، وضيفي إليه مكعبات التلج، وزيني الكوبايات بشرائح الليمون وأوراق النعناع.

*****************

شوربة كريمة عيش الغراب
شوربة كريمة عيش الغراب
المقادير:
* 2 مكعب مرقة الدجاج
* كوب عيش غراب مقطع شرائح
* 2 كوب لبن كامل الدسم
* 3 معالق كبيرة زبدة
* 3 معالق كبيرة دقيق
* معلقة كبيرة قشطة أو كريمة لباني
* ملح وفلفل
* 3 أكواب مية
* معلقة بقدونس مقطع قطعاً صغيرة أو قطع مشروم "للتزيين"
الطريقة:
1- سيّحي معلقة الزبدة في حلة على نار هادئة، وبعد كده ضيفي إليها عيش الغراب، وقلبيهم مع بعض لغاية ما تلاقي إن عيش الغراب لونه ذهبي شيليه من على النار.
2- في حلة تانية سخني الزبدة وضيفي إليها الدقيق وقلبيهم مع بعض لغاية ما لون الدقيق يبقى ذهبي، ضيفي إليه اللبن بالتدريج مع التقليب المستمر علشان ما يكلكعش.
3- بعد كده ضيفي إليهم مكعبات مرقة الدجاج والمية والملح والفلفل مع التقليب المستمر لمدة خمس دقائق أو لغاية ما الخليط يغلي، وبعد كده ضيفي إليه عيش الغراب وسيبيهم على النار لمدة خمس دقائق مع التقليب المستمر.
4- بعد مرور الخمس دقائق شيليه من على النار وحطيه في أطباق الشوربة وممكن تزينيه بالبقدونس، والطبق ده ممكن يتقدم معاه عيش محمص.

*****************

سلطة الفاصوليا البيضاء
سلطة الفاصوليا البيضاء
المقادير:
* علبة فاصوليا بيضاء أو ربع كيلو فاصوليا
* 1/2 كوب بقدونس مقطع قطعاً صغيرة
* بصلة كبيرة
* 3 معالق كبيرة عصير ليمون
* 1/4 كوب زيت ذرة
* ملح وفلفل

الطريقة:
1- لو مش حابة تشتري علبة جاهزة يبقى هاتي الفاصوليا وانقعيها في مية لمدة ساعتين، بعد كده اسلقيها في المية لمدة نص ساعة أو لغاية ما تلاقيها استوت.
2- بعد ما تستوي اغسليها وحطيها في مصفاة علشان تصفي المية اللي فيها، وبعد ما تبرد حطيها في الثلاجة.
3- قبل الفطار بساعة خرجيها من الثلاجة وحطيها في طبق السلطة وقطعي معاها شرائح بصل وضيفي إليهم البقدونس والملح، والفلفل، وعصير الليمون والزيت وقلبيهم مع بعض كويس.

*****************

صدور الفراخ بالسمسم والزبادي
صدور الفراخ بالسمسم والزبادي
المقادير:
* كيلو صدور فراخ
* 1/2 حزمة بقدونس مقطعة قطعاً صغيرة
* بصلة مقطعة قطعاً صغيرة
* 5 فصوص ثوم مفروم
* 1/4 كوب كبير طحينة
* ملح وفلفل
* كوب زبادي كبير
* معلقة كبيرة سمسم (محمص)
* 1/2 كوب دقيق
* 1/2 كوب بقسماط
* زيت للقلي
الطريقة:
1- اغسلي صدور الفراخ كويس، وبعد كده حطيها في مصفاة، واعملي فتحات في صدور الفراخ بالسكينة زي اللي بتتعمل في السندويشات.
2- اخلطي البقدونس مع البصل والثوم والطحينة والملح والفلفل وقلبيهم مع بعض كويس.
3- احشي صدور الفراخ بالخليط السابق اللي إنت عملتيه، واقفلي عليهم بأعواد خشبية (علشان الحشو ما يطلعش لبره).
4- غطي صدور الفراخ من جميع الجهات بالزبادي.
5- اخلطي السمسم المحمص مع الدقيق مع البقسماط كويس، وضيفي ليهم الملح والفلفل.
6- غطي صدور الفراخ بالخليط السابق من جميع الجوانب، وحطيها في الثلاجة لمدة نص ساعة.
7- بعد مرور النص ساعة سخني الزيت كويس، وحمري فيه صدور الفراخ لغاية لونها ما يبقى ذهبي.
8- بعد ما تخلصي تحمير صدور الفراخ حطيها على ورق زبدة علشان يمتصّ الزيت الزائد.
9- بعد كده سخني الفرن على درجة حرارة متوسطة، ودخليها الفرن لمدة ربع ساعة، وبعد كده خرجيها وحطيها في أطباق التقديم، وزيني الطبق بأوراق البقدونس وعلى فكرة مع الطبق ده ممكن أنك تعملي طبق مكرونة بيضاء أو مكرونة بالصلصة.

*****************

لقمة القاضي
لقمة القاضي
المقادير:
* كوب دقيق
* كوب لبن
* معلقة صغيرة خميرة
* ذرة ملح
* 1/4 كوب زيت ذرة
مقادير الشربات:
* 1/2 كوب سكر
* 3/4 كوب مية
* عصير ليمونة
* فانيليا
الطريقة:
1- اخلطي الدقيق مع الخميرة مع الملح، وضيفي إليهم تدريجياً اللبن وهو دافئ.. واعجني المقادير دي كلها مع بعضها كويس، وبعد كده غطيها وسيبيها لمدة 3 ساعات علشان تتخمر.
2- بعد مرور 3 ساعات سخني الزيت، وبعد كده خدي معلقة صغيرة من العجينة دي واقليها في الزيت، وكرري الموضوع ده لغاية ما العجينة تخلص.
3- شيلي لقمة القاضي من الزيت، وحطيها وهي ساخنة في العسل أو الشربات، وبعد كده شيليها منه، وحطيها في مصفاة علشان تتخلص من العسل أو الشربات الزيادة.
4- بعد كده رصيها في طبق التقديم.. وبالهنا والشفا.
طريقة عمل الشربات:
حطي السكر والمية كلهم مع بعض في إناء على نار هادئة لمدة ربع ساعة.. وبعد كده ضيفي الليمون وسيبيه لمدة 5 دقائق لغاية ما يغلي، وحطي الفانيليا وشيليه من على النار وسيبيه لغاية ما يبرد.

*****************

وبكده تكون خلصت عزومتنا النهارده، وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة اوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة ومش عارفة تعمليها ابعتي وقولي لنا عليها واحنا هنقول لك على الطريقة على طوووول..

وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************