اقرئي "كتالوج" خطيبك فهو يستحق محاولاتك لفهمه

أنا بنت عندي 25، تخرّجت من كلية من كليات القمة، عمري ما كلّمت حد من زمايلي الولاد، أنا اتخطبت من 5 شهور "صالونات طبعاً".
المشكله إني مش عارفة لحد دلوقتي إذا كنت بحبه ولا لأ، ومش عارفة أصلاً يعني إيه حب.. أنا بابقى مبسوطة أوي وأنا معاه؛ بس لما بيمشي أو بيسافر بابقى مش طايقاه، وممكن أفسخ الخطوبة على أتفه سبب.
هو طيب أوي ومتدين وابن ناس، وبيقول إنه بيحبني أوي أوي؛ بس مشكلته إنه بيوعدني بحاجات كتيرة ومش بينفّذ منها حاجة، وبدأت أحسّ إنه مش قد كلمته.
هو كمان بتفوته حاجات مهمة أوي بتفرّح البنات، زي الهدايا؛ حتى في المناسبات زي عيد ميلادي مثلاً مش جاب أي حاجة، دي حاجة ضايقتني جداً لأني عارفة إنه مش بخيل.
وهو دايماً محسسني إني مقصرة في حقه، وإني مش بحبه زي ما هو بيحبني.. أعمل إيه عشان أعرف إذا كنت بحبه ولا لا؟ وأعرف إذا كان هو كويس فعلاً إزاي؟
alanine
صديقتي العزيزة، رغم أن سنك مناسب جداً للارتباط؛ إلا أن عندك مشكلة مهمة جداً، وهي أنك ما عندكيش فهم حقيقي لطبيعة الرجل، يمكن عشان زي ما قلتِ إنك عمرك ما كلمتِ حد من زمايلك الولاد، ومش عارفة إذا كان ليك إخوات ذكور أو لأ؟

بس أسئلتك "بحبه أو لا؟ وهو كويس فعلاً أو لا؟" معناها إن فيه قصور في فهمك لنفسك وفهمك له هو كمان.
ببساطة أكتر: لو اشتريتِ جهاز جديد تقدري تشغّليه وتستعمليه من غير ما تقرئي "الكتالوج" أو على الأقل تبصّي على الزراير مكتوب عليها إيه ولا هتدوسي على كل الزراير مرة واحدة بدون ما تعرفي وظايفها؟ طبعاً لا.
ده حل مشكلتك يا صديقتي الجميلة، إنك تقرئي كتالوج " خطيبك"، اعذريني أنا مش قصدي إننا زي الأجهزة؛ طبعاً إنتِ فاهمة إننا بشر، ولنا طبيعة مختلفة عن الأجهزة، وعشان كده إنتِ لازم تفهمي خطيبك كويس قوي. وتفهمي نفسك كمان أكتر.
طبعاً إنتِ بتسألي: إزاي أفهمه وأفهم نفسي؟ أولاً لازم تدّي الموضوع وقت.. 5 شهور مش كفاية، تاني حاجة لازم تتكلموا كتير جداً مع بعض في مواضيع مختلفة؛ يعني فيه كل حاجة وأي حاجة، وتفتحي قلبك له بجد، وتحاولي تسمعيه أكتر وتفتحي معاه مواضيع تجذبه لأنه يتكلم، مش بيقولوا "تكلّم حتى أراك"، و"كل إناء ينضح بما فيه"، يبقى لازم تتكلموا مع بعض في كل حاجة، وكل حاجة بتيجي واحدة واحدة؛ يعني جرّبي تحكي له تفاصيل يومك أو إنتِ بتفكّري في إيه، أو عن مقال قرأتيه وعجبك.. اسأليه عن طبيعة شغله واعرفي قد إيه هو مهتم بيه.
ولما تقوى العلاقة بينكم، ابدئي احكي له عن أدقّ مشاعرك، زي إنك بتكوني متضايقة في غيابه، وإن ده بشكل ما بيعمل شرخ في علاقتكم، وعاوزاكِ تعرفي إن ده طبيعي لأن علاقتكم لسه مش قوية كفاية إنها تخليكي مكتفية بالتفكير فيه حتى وهو مش موجود.
لازم تخلّي علاقتكم تقوى، وتهتمي بيه أكتر؛ لأنه واضح من إحساسه "مقصرة في حقه وإني مش بحبه زي ما هو بيحبني" إنكم بعاد عن بعض.
بس في الوقت ده اللي بتتكلموا فيه، وبتعرفوا بعض أكتر، أنا عاوزاكِ بقى تشغّلي عقلك وتحللي كلامه ده وتفكّري هو ليه بيتكلم كده، وده معناه إنه هيتصرف إزاي في مواقف معينة.
وما تنسيش إن الخطوبة فترة اختبار لحاجات كتير؛ فمثلاً احكي له عن المشاكل اللي بتقرئيها على الفضفضات واسأليه عن رأيه، احكي له كأنها حاجة حصلت لواحدة صاحبتك عشان يهتم، ممكن من رأيه تعرفي قد إيه هو ملتزم ومسئول أو بيفكر بشكل إيجابي أو غيره.
كمان حاولي تقرئي أكتر عن طبيعة الرجل؛ لأن الرجالة غيرنا خالص؛ يعني مش هو بس اللي بينسى المناسبات ولا بتفوته الحاجات اللي بتفرّح البنات، وفي هذا أنصحك بقراءة كتاب ممتاز اسمه "الرجال من المريخ.. النساء من الزهرة"، وعندما تريدين شيئاً منه اطلبيه مباشرة؛ فالرجال لا يفهمون التلميحات، وطالما هو طيب أوي ومتدين وابن ناس ومش بخيل، وفوق كل ده بيحبك؛ فهو يستحق منك محاولة لفهمه وفهم مشاعرك تجاهه أكثر.

لو عايز تفضفض لنا دوس هنا