أنا عندي 19 سنة اتعرّفت على واحد من 3 سنين كان بيحبني من قبلها بكتير، وحاول كتير يكلّمني وأنا ما كنتش موافقة لحد ما حبيته وارتبطنا ببعض، وقتها حسيت إن ما فيش حد في الدنيا بيحبني أده وأنا كمان حبيته أوي، بس ما كناش بنتكلّم كتير وما كناش بنتقابل خالص؛ عشان أهلي كانوا عرفوا الموضوع في أوله وبعدونا عن بعض، بس رجعنا تاني، وهو حاول يتقدّم ليّ بعدها بس رفضوا علشان هو لسه بيدرس. وعشان كانوا متضايقين منه عشان كانوا عارفين إننا كنا مرتبطين؛ المهم في آخر 7 شهور قال لي إحنا لازم نقرّب من بعض أكتر علشان نعرف بعض كويس، وفعلاً ده حصل وبقينا نشوف بعض مرتين في الأسبوع ونتكلّم كل يوم، وما كنتش باعمل أي حاجة إلا لما أستأذنه الأول، واتعلّقنا ببعض أكتر في الفترة دي. وفجأة هو اتغيّر بشكل مفاجئ، وقال لي إنتِ ما بقتيش توحشيني زي الأول خلينا نبعد أسبوعين بعدين نرجع تاني وأنا هتصل بيكِ وما تصلش، كلمته أنا قال لي أنا كنت هكلمك بس برضه كان متغيّر، سألته كتير عن السبب أكد ليّ إنه مش متغيّر وبعد فترة صغيرة ما قدرتش أستحمل إهماله ليّ وما بقتش أتّصل بيه، وهو كمان ما تصلش لحد دلوقتي، والكلام ده من شهرين وأنا هتجنن عاوزة أعرف ليه هو عمل كده. أنا متأكدة إنه كان بيحبني.. بس بجد مش عارفة إزاي قدر يسيبني بسهولة، أنا بجد هتجنن؟!! عاوزة أعرف أنا المفروض أعمل إيه؟!! وليه قلبُه بقى بالقسوة دية عليه بعد ما كنت كل حاجة في حياته، أرجو الرد بسرعة عشان أرتاح، وأعرف أنا إيه غلطي معاه علشان بجد بحبه أوي ومش قادرة أنساه وشكراً.. sogy