16 سنة وبتفكري في الجواز.. مش بدري شوية؟!!

مرحباً أنا عايزة أحكي مشكلتي اللي أنا باحسها أكبر مشكلة في العالم؛ وأنا صغيّرة كنت باعمل علاقات مع الشباب عشان عايزة أتجوّز، باحس إنه بيكمل كياني وشخصيتي بالزواج مش لغرض ثاني والله، وكل شاب باعمل معاه علاقة باحكي له عن اللي قبله، وما فيش فيهم واحد اتخطبت له أو اتجوّزته، وأنا دلوقتي عمري 22 وباحس إن راحت عليّ خلاص، وقاعدة أنا بادور على شاب يتجوّزني، أنا باقول: ليه غيري اتجوزوا وأنا لأ؟!! أنا بقيت باغير من كل بنت بتتخطب، يا ريت تساعدوني.
msa5ma

صديقتي العزيزة:
تفتكري لما يكون عندك 16 سنة هتعرفي واحد عنده كام سنة يعني 20 مثلاً، طب وده يقدر يفتح بيت ويتجوّز؟!!
طبعاً كان لازم العلاقات في السن ده يعتبرها أي شاب مجرد تسلية، ووقت لطيف بيعيشه مع بنت لطيفة مش أكتر..
الحقيقة ده تفكير غريب منك جداً، لكن ما علينا خلينا ندخل أكتر في بعض التفاصيل..
كل واحد تعرفيه بتحكي له على اللي قبله.. يعني رقم 4 حكيتِ له عن ال3 اللي قبله، ورقم خمسة حكيتِ له على الأربعة اللي قبله بمنتهى الصدق، ومتصوّرة إن فيه شاب هيكون راضي إنه يتجوّز من بنت عندها 22 سنة عرفت 3 أو 4 شباب قبله؟!! لأ طبعاً يا عزيزتي فنحن في مصر ولسنا في أوروبا!!
طبعاً أنا متفهم وجهة نظرك، بس مش بالطريقة دي أبداً، ممكن البنت تتجوّز ولو اتجوزت عاوزة واحد مش فارق معاه إن خطيبته -اللي هتبقى مراته- تكون دي طريقة تفكيرها وأسلوب حياتها اللي عاشته قبله.
يا صديقتنا العزيزة ما جعل الله دواء أمتي في حرامها! يعني عُمر ما الشيء الجميل والحلال والطيب اللي عاوزينه نوصل له بطريقة حرام أبداً، ولو حصل بندفع التمن غالي..
أنتِ في سن صغيرة اهتمي بنفسك وبأخلاقك، واقفلي باب الماضي كله، ولا تحدّثي به أحداً أبداً، امحيه علشان ما تكونيش مخبية في نفسك شيء للي هييجي يتجوّزك كأنه لم يكن.
واستغفري لكل علاقة ما كانتش صح في حياتك..
وثقي أن نصيبك هييجي فاستعدي له بصفاء النفس والصدق والخلق الجميل..
وعن إحساسك بشيء من الغيرة لو بنت اتخطبت فده مجرد خاطر شيطاني علشان يحزنك ارفضيه، وقولي في نفسك "وتلك الأيام نداولها بين الناس".. يعني النهارده الفرحة في بيت صاحبتك بُكْره هتبقى عندك، وبلاش الأفكار العميا عن الحقيقة اللي بتحزنك دي.
وعاوزك تعرفي إن ما حدش بيغفر الذنوب إلا الله، وربنا ستر علاقاتك اللي فاتت ما تفضحيهاش إنت بلسانك.. وعلشان يرتاح ضميرك ادفني كل الحاجات اللي فاتت في قبر النسيان.
المشكلة بسيطة إنتِ عاوزة الحب والجواز.. ودي في إيد ربنا.. واللي في إيد ربنا ناخده بما يرضيه مش باللي يغضبه.
انسي اللي فات.. وثقي في الله وادعيه يوفقك للزوج المناسب..
وبدل ما تدوري على الحب في الطرقات خليه هو اللي يخبّط على بابك، وصدّقيني كل واحد بياخد اللي ربنا قاسمهوله..
فاطمئني،،،،

لو عايز تفضفض لنا دوووس هنا