شيش طاووق والحلو جيلي.. عزومة سهلة لكل العيلة

أعدتها لكم: أسماء مصطفى ونيرة أحمد
آخر الأسبوع اللمة مع العيلة أحلى، وعلشان ماتحتاريش في الأكل وتعملي عزومة يحبها كل حبايبك، النهارده جهزنا لك عزومة سهلة وخفيفة وبتعجب الأطفال جدا، عزومتنا النهارده من الفراخ، والحلو والعصير فواكه طبيعية مفيدة ولذيذة.
العصائر الطبيعية مفيدة للأطفال والكبار
عصير الموز بالتفاح
المقادير
ثمرة موز مقطعة لشرائح
1⁄2 كوب عصير برتقال
ثمرة تفاح مقشرة ومقطعة مكعبات صغيرة
1⁄4 كوب لبن
الطريقة
1- اضربي كل المكونات مع بعض كويس في الخلاط لحد ما الخليط يتجانس، وبعدين صبيه في أكواب التقديم.. وبالهنا والشفا.

سلطة السيزر سلطة غنية وخفيفة
سلطة سيزر
المقادير
3 قطع صدور فراخ مقطعة مكعبات
2 ملعقة كبيرة مايونيز
2 ملعقة كبيرة زيت زيتون
2 فص ثوم مفروم
1 خس كابوتشا
1⁄4 كوب خل
ملح وفلفل
جبنة بارميزان (أو أي نوع تحبّيه)
للتزيين
2 قطعة توست محمص ( قطعي التوست مكعبات صغيرة ورصيها في صينية ودخليها الفرن تتحمص)
زيتون أسود حلقات
طماطم مقطّعة شرائح
الطريقة
1- تبلي الفراخ بالملح والفلفل وبعدين شوحيها في الزبدة على النار لحد ما تستوي.
2- ضيفي الفراخ على الخس المقطع في طبق عميق.
2- في طبق صغير، اخلطي المايونيز والملح والفلفل والخل والزيت والثوم، وقلّبيهم مع بعض كويس أوي، واستخدميهم صوص للسلطة.
3- ضيفي التوست والطماطم والزيتون على السلطة، وبكده تبقى جاهزة للتقديم.. وبالهنا والشفا.

الشيش طاووق أكلة خفيفة وشهية
شيش طاووق
المقادير
1 كيلو شيش طاووق (دجاج مخلي مكعبات)
2 كوب زبادي
3 ملعقة صلصة طماطم
بصلة متوسطة
4 فص ثوم
بهارات وتوابل( ملح + فلفل + بابريكا + كاري + قرفة(
زيت زيتون
2 ملعقة خل أبيض
ثمرة بطاطس كبيرة
2 ثمرة طماطم
2 ثمرة فلفل رومي
الطريقة
1- افرمي البصلة والثوم وضيفي عليهم الزبادي والخل وصلصة الطماطم والتوابل واخلطيهم كلهم مع بعض.
2- حطي الفراخ في الخليط وقلبيها كويس فيه وسيبي الفراخ ساعتين في التتبيلة.
3- سخني طاسة تيفال كويس أوي وحطي فيها ملعقة زيت زيتون.
4- شوحي الفراخ في النار لحد ما تبدأ في السوا.
5- قطعي البطاطس والطماطم والفلفل، وهاتي أعواد الشيش الخشبية وحطي فيهم الفراخ والخضار (قطعة فلفل، قطعة طماطم، قطعة بطاطس، قطعة فراخ) وعيدي الترتيب ده مرتين في كل عود.
6- لو عندك شوّاية استخدميها في تسوية الشيش، أو هاتي صينية كبيرة ورصي فيها الشيش وحطيها في الفرن لمدة لا تزيد عن 15 دقيقية.. وبعدين قدميها في الأعواد وزيني الأطباق بخضراوات طازجة.. وبالهنا والشفا.

الأرز البسمتي أنسب طبق جانبي مع الشيش طاووق
أرز بسمتي
المقادير
2 كوب رز بسمتي
3 كوب ميه
2 ملعقة كبيرة زبيب
1/3 كوب لوز مقطع لأنصاف
ملعقة صغيرة ملح
ملعقة كبيرة زبدة
رشة زعفران
2 ملعقة كبيرة زيت زيتون
الطريقة
1- ضيفي على الرز زيت الزيتون والزعفران والزبيب واللوز والملح وقلبيهم مع بعض كويس، وبعد كده ضيفي عليهم الزبدة والميه، وبعد كده حطيهم على النار لحد ما يغلي.
2- أول ما يبدأ في الغليان غطيه وسيبيه على نار هادية لمدة من 15-20 دقيقة (وممكن تسيبه لمدة 5 دقائق زيادة لو حسيتي إنه محتاج تسوية)، وقدميه.. وبالهنا والشفا.

اختاري الفواكه اللي تحبيها مع الجيلي
جيلي بالفواكه
المقادير
2 كيس جيلي
2 كوب فواكه مشكلة مقطعة شرائح (تفاح، موز، كمثرى، فراولة)
4 كوب ماء
الطريقة
1- اغلي الماء وبعدين ارفعيه من على النار ودوّبي فيه محتويات أكياس الجيلي.
2- هاتي قوالب أو أطباق الجيلي وحطي في كل واحد كمية من الفواكه المقطعة.
3- صبي عليهم الجيلي، وسيبيبه يبرد بعدين حطية في التلاجة لحد ما يجمد، ولما تخرجيه تقدري تزيينه بقطع فواكه أو أي نوع من البسكوت اللي بتحبيه، وبكده يبقى جاهز للتقديم.. وبالهنا والشفا.
وبكدة تبقى خلصت عزومتنا،،،
استنونا في وصفات جاية،،،
سلام،،،