كبار الأطباء يتاجرون بأصحاب الأمراض المزمنة

لم يجدوا إلا أن يتحالفوا مع المرض ليقويهم علي الفقر.. احتضنوا المرض واحتضنهم حتي أصبح هو لقمة العيش وطاقة القدر التي فتحت لهم ويبدو أنهم أسقطوا هذه الدعوة "يارب اشفيني واشفي كل مريض" من قاموسهم لأنهم ببساطة مش سيفقدون مصدر رزقهم فهؤلاء.. الناس " شغلتهم إنهم عيانين"..و طلبة كليات الطب يعرفونهم لأنهم يتعلمون عليهم في خامسة وسادسة ويمتحنون عليهم العملي أيضا. معظمهم أصحاب أمراض مزمنة وأمراض جابت أمراض وعملت تاريخ مرضي محترم.. لا أبالغ إذا قلت إنني كنت مع مومياوات متكلمة.. مومياوات تمشي علي الأرض لا أبالغ أيضا إذا قلت إن هؤلاء لا يعرفون خطورة وفداحة ما يفعلونة لكن هل يعرف عمداء كليات الطب أن امتحانات العملي التي يعتمدون نتائجها تمثيل في تمثيل.. الطلبة لهم دور يمثلونه.. والمرضي لهم دور أيضا.. والأساتذة يمثلون أنهم مصدقون!!.. وأطباء جدد يتخرجون بدون علم أو خبرة. يقول الحاج سيد بعد أن تهتكت رئتاه من السل ورغم ذلك فهو حي يرزق أن المرض أقعده عن العمل يقول: لم يكن عندي ما يكفي لشراء طعام لأبنائي والناس تخاف من مريض السل لا تأكل أو تشرب معه ونحن نسكن في عشة في المنيل القديم ب 150 جنيها فوق السطوح والحمام مشترك.. وبفضل هذه المهنة زوجت ثلاثة من أبنائي لكن لا البنات ولا أزواجهن يعرفون حقيقة عملي هم فقط يعرفون أنني أتردد علي قصر العيني لإجراء تحاليل وإشاعات. وعن المقابل المادي الذي يحصل عليه يقول: المتعهدون يحصلون علي 6 آلاف جنيه في الأسبوع لأنه يورد أكثر من مريض في اليوم أما المريض فيحصل علي مبلغ أقل وبالمناسبة المتعهد في الشغلانة دي دوره مهم جدا لأنه يستطيع أن يوفر لنا عملا باستمرار له علاقات داخل الكلية وكلمته مسموعة عند الدكاترة بتمشي كلامه أهو بيشغلنا برضه.. ومش المتعهدين وبس المركز كمان.. مراكز الدروس بيتقاول معاها علي 4 جنيهات لكل طالب يعني 500 طالب يطحنوا فينا لمدة أسبوع والمركز يجمع من هؤلاء الطلاب ألفي جنيه مقابل توفير المرضي ثم يحصل المريض علي ألف جنيه والمركز علي ألف جنيه!! ويضيف قائلا: بدلا من أن تنظروا لنا في لقمة عيشنا انظروا للدكتور فلان من الدكاترة المشهورين بتوع الدروس وعنده مركز ياخذ من الطالب 3000 جنيه * 500 طالب يعني 150 ألف جنيه كل ده في أسبوع ومش مكفيه بيقسم معانا الأربعة جنيهات بتوعنا! هو فيه حد سائل فينا؟ سيد عبدالقادر.. عنده 54 سنة بيشتغل في هذه الشغلانة من 14 سنة كان شغال في مصنع حلويات ب 1200 جنيه في الشهر لديه 3 أبناء يسكن في العمرانية عنده أمراض في صدره وبعدها أصيب بتضخم في الكبد.. يقول إحنا بنشوف المر.. أنت فاهم يعني إيه إن 500 طالب يكشفوا عليك؟ يعدوا عليك واحد واحد كل واحد عايز يفهم إيه اللي بيوجعك.. يضغط بإيده.. ولو قلت له بالراحة أو إنك كده بتتألم يقولك :انت جاي هنا علشان أتعلم فيك.. ولا أنا بتعلم فيك ببلاش.. هو إحنا لقينا حاجة غير الشغلانة دي ومشتغلناش أنا عايز أعمل كشك بدل البهدلة دي.. ومش عارف نروح لمين.. أنا أي مجهود بيتعبني والكبد بيخليني عايز أنام وعندي عيال عايزين ياكلوا ويتعلموا أجيب منين.. ولا حد سائل فينا.. بتستغربوا علي إيه.. وتسألونا في إيه! بنروح الجمعيات الخيرية ونعمل بدل البحث.. عشرة ونبوس علي إيدهم واحد واحد علشان يعطفوا علينا بأي حاجة ولا بيسألوا فينا إحنا مرضي وفقراء في نفس الوقت يعني مش عارفين نتعالج..! أما عم سليمان عمره 45 عام ولديه 5 أولاد وزوجته توفيت ويؤكد أنه خريج معهد خدمة اجتماعية يقول سليمان: عندما كان عمري 10 سنوات أصابتني حمي روماتزمية سببت ارتجاعا في الصمام المترالي والأورطي وأجريت عملية المترالي وعمري 20 سنة وفي سن 25 سنة أصبت بجلطة، حجزت علي آثرها في مستشفي قصر العيني وفوجئت بالطبيب يقول لي: أنا عايز الطلبة يشوفوا حالتك ويكشفوا عليك ونزلت مع الدكتور.. ودخلنا قاعة في قاعات قصر العيني كان فيها 20 طالبا كشفوا علي مكان العملية وفحصوني الدكتور قال لهم حاجات بالإنجليزي مفهمتهاش.. بعدها جمع الطلبة من بعضهم مبلغ 15 جنيه وضعوها في جيبي هذا الكلام كان في عام 89 وقتها لم يكن معي نقود إطلاقا ففرحت بالمبلغ وظللت محجوزا في المستشفي لشهرين من غير ولا مليم.. إلي أن تعرفت علي سليمان المتعهد الذي يتفق مع الدكاترة علي العيانين اللي عايزنهم وعرفت مواعيد الامتحانات عرفت كل حاجة في الشغلانة دي.. وأصبحت أحصل علي مبلغ يتراوح ما بين 200 و300 جنيه وإذا لم أحصل علي المبلغ أترك الطالب يكتشف حالتي بنفسه وكل ده بيفرق في الدرجة والتقدير. أما تشخيص عماد نفسه لحالته فهو وبكلماته باللغة الإنجليزية كالتالي: complain الشكوي يعني shortinbreath يعني كرشة نفس بعد كده بيخش علي past histry المريض اللي حالته حادة اسمه Acute والمريض اللي حالته مزمنة اسمه Chronic أنا بقول للدكتور يكتب في الشيت أنا مغير Mitral Valrepeamen يعني الصمام الميترالي وبسمعه بالسماعة Click sound وعندي Puemonary Hyperl- Ension ضيق في الشريان الرئوي وفيه الشريان الرئوي وفيه PUL SATION نبضات علي SECONDERYA القفص الصدري الناحية الشمال وكده يعني يا دوب أوفر مصاريفي. أما حكاية سعيد.. عمره 31 سنة خريج معهد متوسط أصابته أنيميا حادة من 14 عاما أدت إلي شلل في الجزء الأيسر من جسمه يضطر إلي دخول قصر العيني باستمرار لأنه يعاني تكسيرا في الدم آخر مرة تم حجزه 11 شهرا عندما أصابته الصفراء وعنده كبد وبائي فيروس سي وبي.. يقول: أنا دائما في المستشفي وأحاول توفير مصاريفي وأنه لولا هذه العمل لما استطعت أن أدخل قصر العيني لما اهتم بي الدكاترة عندما أتعرض لأي مشكلة صحية فقد حدث أمامي في إحدي المرات أن طبيبة بدرجة أستاذ مساعد في قسم القلب طردت مريضا لأنه رفض أن يذهب إليها لتشرح عليه للطلبة في الدروس وعن الفرق بين الكشف علي المريض من طلبة كليات الطب المختلفة يقول: في امتحانات طب بنها وطنطا والزقازيق الطالب يجيب علي شيت يعني بيكتب الإجابة وبعد كده يسلمها للدكتور وهنا ممكن نأخذ 200 جنيه في قصر العيني الدكتور بيكون واقف مع الطالب علي السرير وشايف وسامع كل حاجة بنفسه إنت عارف علشان أنام علي سرير من سراير الامتحانات دي بدفع كام؟ 50 جنيها للمتعهد قبل الدخول و25 جنيها تذكرة مبيت وكمان 20 جنيه للمتعهد وأنت خارج تدفعها للتمريض ولو مدفعتش ما يدخلكش ده غير أجرة السفر رايح جاي يعني في قصر العيني الطالب بيدفع 50 جنيه و25 لينا و25 لبتوغ التمريض ودمتم علي كده!