العار

بقلم سالى عبد العزيز
حاولت أكون محايده وأن أتمالك نفسي عن أن أقارن بين مسلسل العار و الفيلم رغم اصرار الممثل جداااا جدااا الفنان مصطفى شعبان الصاق أو الزاق ( برضه مناسبه للي عمله) نفسه بالفنان المتمكن نور الشريف في فيلم العار ..بتقليد نبرة صوته وحركاته وايماءات يده..وحتى في محاولة لتقليد خفة دمه..وهل خفة الدم تقلد!!!ورغم أن الفنان نور الشريف كان يمثل دور الشر الرئيسي في فيلم العار الا انك تتعاطف معه وتحب أن تضحك على ايفيهاته دون الشعور بالبعد الحسي بينك وبينه أو أنه يمثل الخفة علينا..كما حاول مصطفى شعبان أن يفعل ..لقد حاول محاولة أشبهها بتزويج الحمار من الحصان فجاب لنا بغل...أفتكر لو كان اكتفى بأن يؤدي الدور بطبيعة الشخصية المطلوبة منه على الورق دون المحاولة ان يخرَج لنا نور شريف صغنن (مشوه) كنا تقبلناه...يعني تحياتي للفنانه درة التي رحمتنا ولم تجرؤ على محاولة تقليد الفنانة نورا في أي شيء..عرفت نفسها وامكانيتها ومضحكتش على نفسها...مالها دره..أهي عَدت بعملتها....أما شريف سلامه فأعتقد أنه كل ما يظهر على الشاشة في الدور دا بحس انه دايما زي اللي لابس بدلة مش مقاسه..يا كبيرة يا صغيره عليه مش شغلي بس الدور (البدلة) مكنتش مقاسه وهو مقدرش يقيَفها على نفسه خالص الا بالشنب الصغنن اللي لطعه بين منخيره وشفته يعني بحتت الشنب دا الللي برضه استلفه من الاستاذ حسين فهمي ومع استغرابي ان فنان زي حسين فهمي ظل مبقيا على هذا الشارب ليسلمه لشريف سلامة يدا بيد وبكده يطلع شريف شكله جد بقى وشديد وماشي في السليم...الفنانة عفاف شعيب..الدور هوا هواه اللي بتعملوا من يوم ما مثلت بالحجاب فلا فيه شلاليت ولا دياولو زيها زي علا غنم...نفس الدور اللي بتمثلو في كل أفلامها ومسلسلاتها..الجميلة المغرية ودايما عندها خطة راسماها وبتسعى ليها..يا علا يا غانم عملتي الدور حلو لأانك زي الطباخة اللي ميتطلبش منها غيرتطبخ معكرونة بالبشاميل وبقالها عشرة خمستاشر سنة مبتعملش غيرها فأكيد بتفن فيها..بس ممكن تورينا فن بجد في دور غير التيمة اللي انتي مبتتطلعيش منها دي!!...أحمد رزق...ملوش شلاليط عندي لأول مره من زمان أصدقه,المسلسل نفسه...اسفه جدا الاخراج ضعيف ومتهالك...التأليف كان حلو ومعرفش حصله ايه لكن لا عزاء للمؤلفين عليهم يستحملوا الهدَة اللي بتحصل لنصوصهم مقابل اننا بنقبض فلوس..مش أحسن ما يفضل النص مرمي على الرف..واسمه عمل ابداعي..قال ابداعي قال