بقلم علاء الغندور بلطجى يركب جمل: الحقنى يا ريس..انا نزلت ميدان التحرير و عملت فيها عنتر ابن شداد و ضربت المتظاهرين بالخرزانه و السنج و السيف زى انت ما أمرتنى بعد ما دفعتلى 200جنية..بس همه اتلموا عليا و ضربونى علقة سخنه و شكلهم كده هيموتونى..الحقنى يا ريس..ده انت مسئول كبير فى الحزب الوطنى... مسئول الحزب الوطنى: وثنى..وثنى مين..الناس كلها بتقول ان الحزب اسمه الحقيقى الحزب الوثنى بتاع الكفار..انا مندهش جدا..هوه يعنى لما ننهب مال الشعب ونسرق خيراته و نعذب المواطنين و نعتقلهم ..يبقى احنا كفار؟! و بعدين انا هألحقك ازاى و المتظاهرين بيحرقوا الحزب..الحقنى يا احمد عز.. احمد عز : وز..وز ايه يابا..ما راحت ايام الوز و البط و الخير و بقينا فى زمن صعب..انا مش فاهم بس ايه اللى صحى المصريين و الشباب دول عشان يعملوا مظاهرات و محاصرين الحزب و عايزيين يحاكومنى و يا خدوا فلوسى كمان اللى نهبتها من الشعب و بقالنا سنين طويله بنسرق و ننهب البلد..ايه اللى صحاهم دلوقتى..الحقنى يا صفوت الشريف . صفوت الشريف: نضيف ايه و عفيف ايه..و لا أعرفك يا احمد يا عز..انت نهبت البلد فى كرشك و ما قسمتش معايا قسمة الحق فى السرقه و عايزنى دلوقتى الحقك..خلّلينى فى الهم اللى انا فيه..يا جموع المتظاهرين اسمعونى..ان الحزب الوطنى قدم خدمات جليلة للشعب..أى..انتوا بتضربونى بالبيض الممشش يا متظاهرين.ايه اللى حصل بس..ما انا.طول عمرى اخطب و أكذب عليكم و عمرك ما حدفتونى بالبيض الممشش..الحقنى يا جمال مبارك جمال مبارك: خيارك ..خيارك ايه و طماطم ايه و بيض ممشش ايه..هوه ده وقت خطب يا صفوت..خلينا فى المصيبه اللى انا فيها..الناس خلاص مش عايزنى اورث الحكم..يعنى خلاص مش هأبقى الرئيس و انا عامل حسابى على كده و لو ده محصلشى مراتى هتطلقنى..الحقنى يا أحمد نظيف احمد نظيف : رغيف ايه و مراتك ايه..احنا فى ايه و الا فى ايه؟..الشعب محاصر الوزاره و محاصر ال 127 فدان اللى انا نهبتهم من الشعب عشان أعمل عليهم جامعه خاصة و استرزق منها بكام ميت مليون حلوين عشان أأمن مستقبل عروستى الجديده..لأن المليارات بتاعتى اللى نهبتها كلها فى بنوك سويسرا و عاملهم ودائع.و المتظاهرين عايزين يموتونى..الحقنى يا فتحى سرور فتحى سرور: مرور ايه و ودايع ايه يا نظيف..خلينى فى المصيبه اللى انا فيها..الشعب محاصر المجلس الموقر و بيقولوا عليا مزّور بعد ما كنت سيد قراره و عايزين يموتونى عشان زورت الانتخابات بنسبة 98% الحقنى يا ريس..خدنى معاك فى الطيارة الريس : خيارة..خيارة ايه..انا خالع و سايبلك الخياره..انا هربان من البلد..يا روحى ما بعدك روح..انت بيجرى وراك كام ألف متظاهر..انما انا بيجرى ورايا 85 مليون مصرى عايزين يشيلونى من الحكم..ايه يعنى انا رئيس بقالى 30 سنه..طب ما القذافى بيحكم ليبيا من اكتر من 40 سنه..يعنى انا فين و هوه فين؟ و بعدين انا لسه بأكّون نفسى عشان جمال و علاء اولادى و أأمن لهم مستقبلهم..والناس بيحسدونى على ثروتى ال 70مليار دور اللى عندى..طب بذمتك دول يعملوا ايه النهارده..ده الواحد بينزل السوبر ماركت يجيب شوية أجبان و مورتاديللا و يدفع 100 مليون دولار و يمشى..سلام بقا يا سرور..ابقا فكرنى ابعتلكم عيش و حلاوة من لندن