سيجال الشهيد والموت .. بين محمود هليل الهلالى و الشاعرة مرفت حمودة

يا فرحتى وسعدى
بقدوم زينة الرجال
فى حضنى..مين قدى
الشاعرة ميرفت حموده
اهلا برحاب الرسول
طلبت ليها ان انول
ولبي ربي ندايا
ماخلي أملي يطول
الشاعر محمود هليل
يابطل ونولت الشهادة
كانت شجاعتك إرادة
مولود مفطوم ع الرجولة
وميت بطاعة وعبادة
الشاعرة ميرفت حموده
حياتي نقطة في نيلها
وعمري مربوط بخيرها
ولو يقتلوني يوماتي
بروحي برضه هاجيلها
الشاعر محمود هليل
ضربوا فى قلبك رصاصة
ولا جاتلك فى راسك
جبناء فى غايه الخساسة
وانت الشهامة ف خلاصك
الشاعرة ميرفت حموده
أملهم أكون ف تابوت
لاجل مايسلبوا ارضها
ده بيتهم بيت عنكبوت
أهده لو انده إسمها
الشاعر محمود هليل
زينت كفنى وترابى
جهزتلك حضنى كوشه
علقت زينتك ببابى
وحوريه هى العروسه
الشاعرة ميرفت حموده
ولا عمري خفت منك
ولا عمري اتمنيت اعيش
شهادتي نولتها اكمنك
تمن أدفعه ومايهمنيش
الشاعر محمود هليل
ريحة المسك ف جبينك
وفرشتلك قبر مرمر
اسد وحميت عرينك
فارس والقلب أخضر
الشاعرة ميرفت حموده
بلدي انا حتة منها
واصنع بدمي مصيرها
ولو ليا مليون روح
هادفعهم وارفع جبينها
الشاعر محمود هليل
بلدك بتنادى إسمك
تعشق ترابك ورسمك
حفظت روحك ف نيلها
وأديتنى بس جسمك
الشاعرة ميرفت حموده
بلدي دي غنوة حياتي
كبّرْت وكبْرِت معايا
لو صوتها يعلي بموتي
أموت وتحيا كفاية
الشاعر محمود هليل
ساعة ما جيتنى بدمك
حبيتنى أنا لجل أمك
عرفت قيمتك وشأنك
لا تهابنى و? كنت أهمك
الشاعرة ميرفت حموده
روحي هايمة بكل حبي
طايفة في رحاب الجنان
حي أرزق عند ربي
رزق وهانوله كمان
الشاعر محمود هليل
جسدك الغالى فى كفنى
روحك الصافيه ف سكونى
عمر التراب يوم ما يفنى
الطهاره والنقاء اللى زارونى
الشاعرة ميرفت حموده
حضنك روضة بتستناني
وتوريني مكاني كمان
جنة خلد وبابها لقاني
وحور العين شايلة لي حنان
الشاعر محمود هليل
أنا الموت اللى اتمنيته
هاخدك ع الجنه وانهارها
رب الكون صليت وناجيته
وعد ان انت شهيد وساكنها
الشاعرة ميرفت حموده
اكتر شئ راح يروي الروح
موتي يكون حرية وبوح
واشوف راية لفوق مرفوعة
وأشوف الارهاب مفضوح