آه منك يا زمانى آه من ظلم البشر

آه منك يا زمانى
آه من جروحى وألامى
آه من قسوة أيامى
آه من ظلم البشر
آه منك يا جارى
يعنى أيه لو حد سألك عنى
تقول مش ساكن جنبى
ولا عارف إسمى ولا عنوانى
آه من جفاء البشر
آه منك يا صاحبى
يعنى أيه لما أأتمنك على سرى
تغسله وتنشره وتعرى
وكأنى لبانه بتندغنى
وتتسلى بسيرتى البشر
آه منك يا ولدى
يعنى أيه تبعد وتسيبنى
دفيتك من البرد ف حضنى
ربيتك وإتمنيتك تبقى أحسن منى
ولما تكبر تجافينى وتهملنى
آه لو تعرف مدى إحتياجى ليك ف الكبر
آه منك يا زمانى
الدموع ما بتنشف من عينى
سهران الليل أشكى وأبكى
كله نايم غرقان ف العسل
ولا حد سامعنى من البشر
شكوتى ليك يا ربى
يا رحيم إنت الملبى
نزل الرحمه ف قلوب البشر
البشر مبقاش بشر
القلب مكانه حجر
الناس بتكفر وتنتحر
مفيش إللى يسد ويكفى
الطلبات أكتر من دخلى
الناس خلاص هتنفجر
خيرك كتير يا بلدى
مين إللى بيسرق حقى
معقول الناس دى بشر
آه منك يا زمانى
آه من ظلم البشر