للبيوت وش صابر‎.....بقلم الشاعر : اشرف ابو الحمد الخطيب

(مفتتح)
الكلمة كما الغنوة في كف الريح / يا تِسْكَر من خمرة حروفها المشاعر / يا تملا كهوف الصَّبر تباريح / طول عمرى وأنا الشاعر / والنبض ساري صريح / معرفش مين كان لي غادر / ولا مين بيغزل من وجعي تسابيح /طول عمري والعتمة بترمي في ضهري خناجر / وعود النهار على مُهري جريح ..
للبيوت وش صابر
يغزل ضفاير الشمس
ف كفوف الولاد غناوى لليوم الجديد
يبدر حدود الكلمة مواويل ..
ياليل ..تدوب جليد الخوف..
وتكحل رمش موالى
جرح السنين نوَّاح ف ترحالى
كل العيون راصده مشانق ضحكتى
والآهه عكازى والمدد
شهد الكلام عويل ..
بيشق صدر العتمة مدد
ونغم بلون التباريح ..
راسم ملامحى ع الحيطان سند
مدد .. مدد .. مدد
مش عارف إيه سر عشقي ليكى يا بلد !!
يا أم السنين الشقيانين
يا أم الولاد الطيبين .. والوفا ..
ياصرخة الليل الحزين
كل السكك متكتفه
للبيوت وش صابر
يغزل ضفاير الشمس
ف كفوف الولاد غناوى لليوم الجديد
يبدر حدود الكلمة مواويل ..
ياليل ..تدوب جليد الخوف..
وتكحل رمش موالى
جرح السنين نوَّاح ف ترحالى
كل العيون راصده مشانق ضحكتى
والآهه عكازى والمدد
شهد الكلام عويل ..
بيشق صدر العتمة مدد
ونغم بلون التباريح ..
راسم ملامحى ع الحيطان سند
مدد .. مدد .. مدد
مش عارف إيه سر عشقي ليكى يا بلد !!
يا أم السنين الشقيانين
يا أم الولاد الطيبين .. والوفا ..
ياصرخة الليل الحزين
كل السكك متكتفه
صابر ..
والنبض جوايا حيل بيكابر
عايش كما درويش فى قلب ضريح
حبات مسبحته مشاعر
بيسبح بأسم الشهيد والجريح
ويرقى البيوت بالحذر
ويقيد شمس الضماير
صابر ..
والدم بيحنى الشحر
شجر الصبَّار ما عادش قادر
داير يخبط ع البيوت
وف كفه نبوت المدد
يا أم صابر
يا دير ياسين
يا بحر البقر
يا أم الصبيه والولد
مدد .. مدد .. مدد
مش عارف إيه سر عشقي ليكى يا بلد !!
رغم السنين العجاف
رغم اللي خان واللي خاف
شراييني شجر صفصاف
بتضلل عليكى مشاعر
صابر ..
رغم السكات اللى صاب..
كل الحناجر
رغم الحدود والعهود
واللي نصبوا من حبى مشانق
ورموا في ضهرى خناجر
أنا شارب كاس القدر
ما نيش عاصي ولا كافر
بس أمانه يا بلد
لو جادت دروبك تاني بالولد
ما تسمي حد تاني صابر
مش عشان حاجه لاكن
خليه بلا أسم ..
خليه ذى المصير
مهما تتبدل أماكن
يفضل جرحه زى ماهو
جوه نن القلب ساكن
وما تخافيش
لما تتلاقى السنين
أوعي يصيبك سهم الأنين
أو يدق حد غيرى بابك
وتفتحيله
أو يغرك في العتمة ..
زيت قناديله
مش حقولك إنه دمي ..!!
بس إنتي عارفه يا بلدنا
إنك إنتي كل همي
وإني واقف تحت ضلك
وبربابي بواسي همك
وف عز البرد ..
وغُربة صباري بضمك ..
وأنتي واقفه ..
تنزفيني
فسبلينى فوق دروبك سبليني
وإن دابت في هجر الأحبة شموسك
أنضرى شموس المَحَنَّة ف عيني
..مدد ..
مش عارف إيه سر عشقي ليكى..
يا بلد !!
..مدد ..
..مدد ..
مدد .