كفاية ....... بقلم مرفت حموده

بأحس بعتمة الأيام
ووأد الفرحة جوايا
لو أنده ع الحبيب مرة
بيطلع صوتي دمعاية
تقوللى ليه بتتمني
وعايشة الحب ف حكاية؟
حبيبك ده ماكان له وجود
حبيبك صورة فى مراية
كلامه كتير وكله كلام
وفاكره كلامه ده آية؟
حبيبك حبه كان لعبة
كان له وسيلة مش غاية
حبيبك ضحكته كدبه
وشجرُه مالوهش ضلاية
وقلبه كان حجر صوان
يدور ويلف فى رحاية
عاوز له كل يوم قصة
يعيش وياها فى رواية
ويرسم ع الوجود حبه
وينهى سطورها ببداية
لقتني في الهوى ضايعة
غريبة ف قلب دنيايا
خلاص قلبى رفض كدبه-
وحط لقصتى نهايه
قفلت الروح على جرحى
حبست هوايا جوايا
وقلت كفاية يا نفسى
كده كفاية ..كده كفاية