الشاعر عبد الحميد بدوى : يا خالد قوم من قبرك

يا خالد قوم من قبرك
وقول مين موتك ومين ضربك
وقول مين عذبك ومين قهرك
قول مين ذلك ومين سحلك
بيقولوا الداخلية بريئة من دمك
هو أنت تطلع مين بسلامتك
كل يوم فيه كتير زيك
ويمكن أكتر بكتير منك
ماهو ده أهم فوائد الأمن والنظام
إنها تحرق قلبنا وقلبك
إنها تقهرك فى قعر بطنك
إنها تعرفك قيمتك
إنها تقصف عمرك
إنها تكسر عضمك
إنها تحزن أهلك
يا خالد اطلع من قبرك
والله حتى لو طلعت
والله لو بعد الموت نطقت
ما حد هيسمعلك
هو أنت لما كنت بتموت
كان مين رحمك
كان مين سمعك
يا خالد قوم من قبرك
يمكن نقوموا بعدك
يمكن نقوموا بعدك
مش أنت لوحدك اللى مت
دا إحنا كلنا ميتين من قبلك
يمكن نقدروا نأخدوا حقنا وحقك
كل الناس اللى شاهدوا
محدش سمعهم طظ فى كلامهم
هما ما بيسمعوش غير نفسهم
التقارير كلها جاهزة عندهم
بيقولوا إنك مسجل خطر من زمان
وعليك قواضى وعليك أحكام
ومشكوك فى شرفك
وبعت بلدك وغيرت دينك وغيرت اسمك
وقالوا كلام بعيد عنك
وكأنهم عايزين مكافأة قتلك
وكويس إنهم ريحوا البشرية منك
ربنا يرحمك يا خالد وربنا لوحده
اللى يقدر يأخد حقك
تقرير الطب الشرعى أول وتانى
بيقول إن البانجو عملك احتباس حرارى
آه يا نارى
هما يعنى هيغلبوا ما هما اتعودا
وكل الجرايد الحكومية بتقول إنك مفترى
وحتى وأنت ميت على الناس بتفترى
وأنت اللى خنقت نفسك بنفسك
وأنت اللى كسرت ضلوعك وكسرت الجمجمة
ومحدش فيهم جه ناحيتك ولا لمسك ولا قالك مرحبا
أنت اللى طحنت نفسك بنفسك ودخلت المفرمة
وظلمت المخبرين علشان مهما ناس طيبة
والواحد فيهم إيديه مطرحتين ناس متفصلة
أنا عارف أن القضية مش قضية مخبرين
القضية قضية شعب كاتم
وساكت وشايل الطين
وميعرفش حقه فين
مكسور الجناح ومطاطى الجبين
معندوش إرادة طيب هو هيجيب الإرادة منين
وصورة خالد قدامه عينية عينة
القضية قضية دولة عدوها الأول هو شعبها
ودايما شيفاه حمل تقيل على قلبها
وعايزة تخلص منه ومش عارفه توديه فين؟
ربنا يقدرها وكتر ألف خيرها
وفعلا الداخلية شايفه شغلها
والشعب هو همها ولا حد تانى يهمها
وكلنا متهمين وشوفوا خالد راح فين
من غير أى ذنب واسألوا رجال الأمن
هيطلع أحنا اللى علينا الحق
وأحنا اللى نستاهلوا الموت والتعذيب
واحنا اللى نستاهلوا الشنق
هما بشاوات ولاد بشاوات
وأحنا ولاد ستين كلب
أحنا اللى نستاهلوا الحرق
أحنا اللى مخلوقين علشان راحكتم
ربنا ينتقم منكم
بس لازم تعرفوا
أن الدنيا مش دايما لحد
الدنيا مش دايما لحد.