زغروته لأهل البلد .....قصيده للشاعر مصطفى محمود أبو إبراهيم

زغروته لأهل البلد
من ملكه مصريه
شعب يحب الغلب
والدمع له غيه
إحكى يا نفرتيتى
وقولى يا وليّه
الثوره لينا دوا
عداله وحريه
ردت بسرعه عاليا
والضحكه مدويه
قالت ابويه الملك
و اسمه كان آى
فكو رموز الحجر
من قبل دنشواى
شعب يموت فى القهر
دايماً تقولو آى
وقالوا إنه جين وراثى
قالوا تانى إنه قاسى
دى طبيعة شعبنا
كرباج ورا لبعضنا
ويتهمنا كلنا
إننا حتة أجنده
يا إما عُمله
تقوللى ثوره لأ مناوره
مش مهم دا الأهم
يجيلنا حد يذلنا
للأسف دى طبيعة شعبنا
أصل المصيبه مننا
نجرى وراه ونقول معاه
تعال أحكم شعبنا
وحكمك أنته ياواد رشيد
علشان عرفت تذلنا
قولو معايه وكمان ورايا
للأسف دى طبيعة شعبنا
نموت وإحنا بنشتكى
واللى يلم شملنا
نقوله أمشى من هنا
مطلب اساسى
الهم يوصل لكل ناسى
والدم يبأه للركب
أصل السعاده فى المآسى
يا سيادة المشير
خبيته فينه الغفير
الثوره كانت فى التحرير
شباب ومات هناك كتير
من بعد طلب الكرامه
صبحنا نطلب أمن
والأزمة تلو الأزمه
ولا حد عنده دم
يا خسارة يا ثوره
مين يعزيك !
الكل تايه فى دربك
الله لا يوريك
والله برافو يا حسنى
يا بن مبارك
طنطاوى نفذ أمر
وبلغت مرادك
وأنت ياشعب الغلب
عاشق لفرعونك
يقتل ويسحل ويظلم
تقوله خدامك
يا خساره لما الثوره
تجيب لورا أوام
والخاين يبأه مخلص
يقف بمصر إمام
يبأه الصلاه باطل
ولا عمرها تنقام
الفرصه راحت يابلدى
ولا جيم اوفر ؟؟؟