ماتكملوش ... بقلم محمد صلاح

انا اللي زمان قولتلكم كملوا
بقولكم ماتكملوش
في البداية شفت فيكو الضمير
حسيت في قلوبكو خير
بس الليلادي عرفت
اني كنت اعمى وضرير
غزلت ليكم قماش العشق ولبسته
كفنت قلبي بالأمل وصدقته
وطلعت فاضي اليد
لا خدت منكم حق ولا حتى ديني اتسد
ولا دم اخويا برد ولا وش ابويا رد
ولا دمع امي جف
رميتوا لينا الشبك بالطعم
وفجأة نلقى الطعم انقطع
والشبك في رقابنا اتلف
وكل الكلام طلع زيف
بتمدوا اديكم بالسلام
ومانلمسش غير طراطيف
لبستونا عمة
وحكمتوا بالحق مايتسجنش
غير يومين تخاطيف
وقولتوا الحق اتنطق
دخل القضاة الساحة والخلق ملمومة
فرحانة فاكرة ان القضية اصلا محكومة
مايعرفوش ان القضية
قضية ياسين
وبهية لساها واقفة تبكي وتنوح
عاللي فتح ليها الجروح
وغاب حتى عن عينها لاجل تطفي نارها
وتاخد تارها
وتقيم العزا
عملتوا كيف الحكم اللي حكم بالجور
نورنا ليكو الطريق
وطفيتوا انتوا النور
وظلمتوا برضو البنية
زودتوا نارها
وكسرتوا تارها
وقعدتوا جارها
تطبطبوا وتملسوا وتقولوا
راح اللي راح
وان الشهيد ارتاح
بكفاية بكا ونواح
لساكي حلوة وصبية
زي القمر يا بهية
انسي اللي راح
وخليكي زينة
بدل ما ناخد اللي باقي
ونعلق رقابهم زينة
صرخت بهية بعلو صوتها
ازاي انا انسى حد حب يشوفني حلوة
ورسمني بين شفايفه اجمل وارق غنوة
وقدملي دمه خمر لعيوني
سكرني
وجيتوا انتوا تجروني
لحقني
وتقولوا انسى
دا اللي اتقتل منكم أمل
اياكم عليا تجوروا
ويا إما تبقوا ياسين
يا إما ترحلوا وتغوروا