اديني دماغك لمدة دقايق

بقلم : رانيا مسعود
اوعى يا مصري يغرك جسمك وتفتكر إنك السبب في إنك حررت مصر يوم 6 أكتوبر سنة 73
واوعى كمان تفتكر إن الخطة الحكيمة والسياسة الرشيدة برضو هي اللي حررت مصر أو عبرت القنال
اوعى يغرك إنك كنت معاك عتاد وإنك خير أجناد الأرض لما رحت كل حتة في العالم تقول وتتباهى بكلام الرسول عنك
لأنك ببساطة ولا حاجة
أيوة ولا حاجة خالص
طب خد الجامدة قوي
إوعى تفتكر يا حلو يا شاطر إنك فتحت صدرك يوم 25 للأمن المركزي وعشان كدة الثورة بتاعتك نجحت
ولا تغتر في نفسك يا أمور وتاخدك كدة الجلالة برضو وتقول إن الجيش حامي حمى الديار وهو اللي خد بتارك من الشرطة الوحشة اللي قتلتك
طب إيييييييييييييييييييييييييييييه؟؟؟؟؟
بص يا جدع أنتَ وهو وشوف
على فكرة ولا حاجة من اللي فاتوا دي كانت السبب في أي انتصار لك أو لغيرك
لأن
لو قريت الكلمتين دول هتعرف بجد هو ليه أنتَ انتصرت
"إنما النصرُ من عِند الله" صدق الله العظيم
يعني ربنا لولا فضله عليك ما كنت حققت أي حاجة
وخد في بالك: لا حول ولا قوة إلا بالله
يعني لا حول لك ولا قوة لك إلا بالله
هتقول لي: أنا مؤمن ومسلم الحمد لله وعارف كدة كويس بس هرد عليك وأقولك حاجة
الناس بعد الانتصار بتاخدها الجلالة
افتكروا كويس الحكمة الشهيرة: ابتسم عند الهزيمة وتواضع عند النصر
طب ليه بقى؟
عشان يا شاطر البسمة اللي هتبتسمها بتديلك طاقة أمل تُكمل عند هزيمتك وتُصر بإيمانك بالله بالطبع إنك تنتصر
طب والتواضع عند النصر؟؟
هو ربنا مش قال لك إنه لا يحب الفرحين؟؟
بمعنى إن ربنا لا يحب كل مختال فخور
طب واللي أنتَ بتعمله من يوم 25لحد النهاردة إيه؟؟
أقولك أنا يا سيدي
الناس في المظاهرات من ساعة ما كانت بتنزل تدافع عن حق أخونا خالد سعيد اللي قتلته الشرطة ونزلوا بالآلاف في القاهرة أمام وزارة الداخلية عارف لما كان العصر يؤذن له كانوا بيقفوا مكانهم وبيصلوا
ودا معناه إيه؟
معناه إنك كل ما تسجد لله ربنا بيرفعك
وما تواضع أحدٌ لله إلا رفعه
طيب يا سيدي ومن يوم 25 يناير لو تفتكر كويس المشهد كان بيبقى عامل إزاي
التحرير كله مردوم بالمصلين
ركوع وسجود موحد
خضوع وخشوع لله لكي ننجو جميعًا من النكبة والكارثة
وبرضو ما تفكرش إنه بكيفك لأ دا كله تدبير ربنا اللي جعل مننا الجمع الكبير دا اللي يسجد لله
برضو مش فاهم حاجة
أقولك أنا يا سيدي
مين أكتر ناس خايفة من المنظر دا اللي هو سجود وركوع وقيام للصلاة؟
إسرائيل وبني صهيون
طيب يا جماعة
مبارك وأعوانه لو تفتكروا كانوا بيعملوا إيه في الناس ومازالوا؟
الناس بتبعد عن ربنا مقابل إذلالهم للمال والسلطة والجاه(متع الدنيا القليلة) وفي المقابل هما نفسهم مفتونين بكل دا ويا خسارة لحساب برضو إسرائيل
طب وليه؟؟؟
عشان إسرائيل عارفة كويس يوم ما هيوصل عدد المصلين في صلاة الفجر إلى عددهم نفسه في صلاة الجمعة هننتصر نحن -المسلمين- عليهم ومن ثَمَّ بتلعب على إن الشباب يكون أبعد ما يكون عن الصلاة وبالذات في الفجر
طيب وبعدين
أيام الثورة الطاقة الإيمانية عليت شوية وربنا نصرنا عليهم فأول شيء عملوا وقيعة بين المصريين: أقباط ومسلمين...ودا كله مخطط
بعد شوية ادعوا موضوع السلفيين والإخوان برضو
والهدف برضو واحد: إبعاد المصريين عن الصلاة في الفجر بأعداد كبيرة لأن عددنا لو وصل لنفس عدد المصلين في الجمعة هننتصر برضو عليهم
ادعاء الدولة هتبقى: مدنية ولا إسلامية ولا قبطية ولا علمانية دا ادعاء فارغ والمقصود منه نفس الموضوع: عدد مؤدي صلاة الفجر لا يرتفع ويا حبذا لو كمان الشباب ما صلوش خالص وكرهوا الدين
طيب يا جماعة بالعقل كدة وبالمنطق ليه كمية الأفلام الهابطة دي شغلتنا في العيد وليه كمية المهرجانات وليه حرب المسلسلات وليه وليه؟؟؟
الإجابة: إلهاء فإلهاء فإلهاء
نصيحة عشان ترجع تلبسها تاني (دماغك ولا مؤاخذة)
اللي فينا نصراني قبطي يا ريت يظل على مبدأه، واللي فينا علماني أو ليبرالي أو حتى ملحد يا ريت يخليه في نفسه برضو
واللي فينا إخواني أو سلفي كذلك يخليه في نفسه
لأننا كلنا مسلمين في مصر. عارفين يعني إيه مسلمين؟ يعني أسلمنا إن مفيش رب لمصر وللعالم كله غير رب واحد هو اللي هيخلصنا من كل الكوارث والنكبات اللي إحنا فيها.
ويا ريت كوننا مصريين مسلمين بوجود ربنا ووقوفه جنبنا يخلينا نطبق معتقداتنا الجميلة
اللي شايف غلطات وعيوب الإخوان وبيحاربهم بيها يا ريت يبص على جواه ويشوف الصح اللي في كتابه وسنة رسوله ويطبقه
ونصيحة قوية جدًّا يا جماعة:
الصلاة
الصلاة
الصلاة
هي دي اللي هتنجينا وخدوا بالكم إن القذافي قال لشعبه: ارقصوا وامرحوا!! يعني: إلهاء إلهاء إلهاء!!
ومحصلة الإلهاء إنك هتبقى مختالًا فخورًا
وروح اسمع كلام أوباما اللي نفخ فيك وخلاك مكروه بالنسبة لربنا "إن الله لا يحب كل مختال فخور" وارفع راسك عشان أنتَ اللي جبت النصر وسيبك من الصلاة وارقص وامرح وأزأز لب وكاراتيه وسوداني في التحرير وكل لك كشري وحارب أخوك الإخواني وأخوك السلفي وأخوك الليبرالي وأخوك العلماني وبلاش تدعي لحد إن ربنا يهديه عشان حقيقي تكون بتطبق كلام: القذافي، أوباما، وإسرائيل قبلهم.
خلصت كلام يا معلم
ارجع البسها وإن شالله ما تقلعها تاني أبدًا
بنوتة مصرية