الشعب يرفض الحريه و الديمقراطيه

بقلم عطيه ثروت
عارفين الشعب المصرى عامل زى ايه :
زى واحد كان مسجون 30سنة وبعدين خرج من السجن معرفش يعيش وهو حر طليق حاسس بغربة وهو وسط الناس ماشى فى الشارع والناس كلها بتكلموه باحترام وادب .. الراجل زهق وحس بخوف شديد هو مش متعود على الحياة ده هو اتعود على حياة السجن الشديدة .. رجع الراجل السجن وقالهم انا عايز ادخل السجن تانى قالولوا ماينفعش وقف قدام باب السجن وبكى وقالهم معلش ارحمونى مش قادر اعيش حر انا حاسس انى غريب فى الحرية ..انا اتعود على الشدة والاوامر انا حاسس انى حموت لو فضلت حر !!
حراس السجن افتكروا الراجل مجنون فضربوه وبعدوه عن باب السجن بالقوة الراجل قرر انه ينتقم من الحرية فمشى فى الشوارع زى المجنون مش راضى بعيشة الحرية ورفضها وعايز بأى شكل يرجع تانى السجن الى عاش فيه 30سنة فبقى يكسر ويضرب ويؤذى الناس.
المصريين دلوقتي كدة!! هما حاسين أن توب الحرية واسع عليهم شوية عايزين يشلوه من على جسمهم مش عارفين ...بدأو يشتاقوا لضابط الشرطة الى بيضربهم ويهنهم هما مش عاوزين ضابط شرطة محترم لان الضابط المحترم فى نظرهم ضابط (خيخة ) بيخاف !!
عايزين رئيس وزراء حرامى لانهم اتعودوا على الحاكم الحرامى الظالم مش قادرين يتعملوا مع ناس محترمين ... الشعب المصرى جوه دمه جين اسمه (شعب يخاف ما يختشيش)
شعب مش فاهم يعنى ايه حرية وديمقراطية اتعود من ايام الفراعنة ان الحاكم يكون شديد ويعاملهم بالكرباج والنار .. شعب يتلذذ بالمهانة والذل والتعذيب
هات تاريخ مصر من ايام الفراعنة حتلاقى افضل فترات مصر لما تولى حكمها حاكم شديد عامل المصريين بالشدة .. الملك خوفوا ذل الشعب وعذبهم فبنوا اكبربناء واعظم بناء على الارض (هرم خوفو ) .. الملك منتوحتب لما حصلت ثورات فى مصر رجع الاستقرار للبلد لما قبض على الفاسدين وواعدمهم وفى كتب التاريخ مكتوب (اعاد الامن بقوة السلاح واعدام الفاسدين والخارجين عن القانون )
المماليك رغم انهم مماليك ومش مصريين الا انهم عاملوا المصريين بالشدة وكانوا يعتبروا ان المصرى اكثر منهم عبودية وانه ما يتحكمش الا بالشدة ..عشان كدة المماليك عرفوا يحكموا المصريين رغم انهم مماليك يعنى رقيق وعبيد
محمد على لما حكم مصر عشان يقدر يسيطر على الشعب اول حاجة عملها هدد زعماء الشعب الى وصلوه للحكم ونفى عمر مكرم وبدأ يظهر قوته وكان دايما يمشى وماسك فى ايده كرباج .. وعشان يخوف المصريين اكتر ذبح المماليك فى القلعة ... المماليك الى كانوا المصريين بيخافوا منهم
وغيرهم من الحكام الى فهموا ان الشعب المصرى شعب يخاف ما يختشيش !!
ياشعب عيب عليك بعد ما عملت ثورة من اعظم ثورات العالم رجعتلك كرامتك وحريتك وكلنا حسينا ان مصر خلاص بتعتنا .. مش قادرين نفهم معنى الحرية .. سرقة وبلطجة ومظاهرات وقطع طرق وامتناع عن العمل .. كل ده بيقطع توب الحرية الجميل ...شكلنا كده حنرجع نلبس توب السجن !! توب الذل والاهانة ( تخيلوا فى ناس ندمانة ان الثورة حصلت )