اهم تعليقات الناس بعد شائعات هروب مبارك على الفيس بوك وتويتر.. الشعب يطالب بعمل فيديو لمبارك

انطلقت هتافات الناس بعد اشاعة هروب مبارك منها "الشعب يريد مبارك في الفيديو.. الشعب يريد مبارك بأجندة" .. رددها نشاطاء على موقعي "توتير" و"فيس بوك" على الإنترنت إثر تردد أخبار عن هروب الرئيس المصري المخلوع، حسني مبارك، من مصر إلى الخارج، وهي الأخبار التي تم نفيها من السلطات الأمنية.
وكانت جريدة الواقع أول الصحف التي كذبت الخبر الذي اريد من وراءه الفتن ، ولكن نقلت عدة صحف ومواقع مصرية، مثل موقعي الوفد ومصراوي وقناة العربية عن شهود عيان أن الرئيس المخلوع حسنى مبارك تم نقله بسيارة إسعاف بيضاء اللون في حدود الساعة الحادية عشر مساء الجمعة باتجاه مهبط الطائرات المتواجد خلف مستشفي شرم الشيخ الدولي لنقله عبر طائرة حربية.
الشعب يريد تصوير مبارك
وانهالت التعليقات على مواقع التواصل الاجتماعي مثل "فيس بوك" و"تويتر" على هذه الأنباء، كان منها ما طالب السلطات بتصوير مبارك في المستشفى بالصوت والصورة وبطريقة تؤكد تواجده في مستشفى شرم الشيخ وموعد هذا التسجيل، خاصة وأن أخبار هروب مبارك إلى الخارج لم تنقطع منذ تنحيه عن الحكم في 11 فبراير الماضي تحت وطأة مظاهرات واعتصامات شعبية عارمة طوال 18 يوما.
ومن هذه التعليقات:
حسين: لو مبارك طلع هرب فعلا نبقى احنا إيه؟
سالم محروس: الشعب يريد فيديو لمبارك..لازم نشوفه في فيديو ولو خمس دقائق
منى السيد: لازم يورونا مبارك يخلوه واقف قدام المستشفى عشان نقرا اسمها ونتأكد إنه قدامها هي مش أي مستشفى تاني، ويكون ماسك ورقة نتيجة ولا أجندة ولاجريدة بتاريخ الأيام دي
إيجيبتو لوجيستو: المتأمل في حال مبارك يري عظمة الله و قدرته لفظه الشعب و خلعه فذهب الي شرم الشيخ ليرفضه أهلها فهل تلفظه الأرض إذا ما دفن فيها
محمد 90 انا اسف اني سبتك تخلع من غير حساب كان المفروض حاسبتك زي ماقال الكتاب
فهمي مصطفى: اخبار مصر عام 2017: أنباء عن تحسن حالة مبارك والنفسية و امكانية نقلة الي سجن طرة الجديد قريبا
على صفحة 25
أحمد جمال أحمد: إشاعات مغرضة
أحمد نادي: هيسيب جيمي لمين
عبد العزيز إبراهيم: كلها اشاعات يهرب ايه بس , كل مافيها انهم ممكن يكونوا نقلوه لمستشفى تانيه خارج شرم الشيخ
فرح فلافي: ما انا بقول انهم سربوا الخبر علشان يشوفوا رد فعلنا بلاش استهتار يا جماعة في الخبر ده بلييييييييييييز
محمد عز العباس بغض النظر انها إشاعه من عدمه علنيه المحاكمات امر ضروري لإنه حق الشعب وثانيأً لإخماد الاشاعات
حكيم سلماني: من غير ما اعرف مصدر الخبر متاكد انه كاذب ...الجيش عارف كويس اوي ان هروب مبارك يعني ثوره جديده ضده وخراب للبلد ميقدرش يعمل كده وملوش مصلحه انه يعمل كده هما مش اغبيه للدرجه دي يعني واضح انها اشاعه الغرد منها تسخين الجيش زياده انه ينقل حسني مبارك لطره واعتقد ان ده اصبح وشيك جدا
بسام محمد: إطمنوا ومش هاتشوفوة ولا حد فينا هايشوفة غير لما يتذاع خبر الوفاة والايام جاية وهانشوف
مي أحمد: ممكن يكون الخبر صح لانى من الاول وانا متاكده انى مبارك خارج مصر
مدحت طه: ده لو ماكنش هرب من فترة - - فى حد شافة؟
يارا سمير: مش لو اصلا فى مصر
أحمد طارق: السؤال هو هل المخلوع كان فى مستشفى شرم اصلا؟؟؟؟ مش الجزيرة قالت قبل كده انه راح المانيا؟؟
شيماء فاروق: هو الجيش ساذج اوى كده علشان يهربه دلوقتى ...لو عاوز يهربه كان هربه بعد التنحى علطول.
أحمد نبيل: فين الشفافيه يا مجلس يا عسكرى احنا عايزين نشوفه يا اما نصدق بقى انه هرب واستحملوا انتوا العواقب بقى.