الشندويلي يبحث عن أردوغان مصري

أردوغان
يا أب للنخوة
يا ابن للإيمان
وأخ للعزة
وكرامة الإنسان
يا بسمة الطفل الفخور....
بأب شجاع
وجمال عينيه لما ينام فى أمان
يا حلم ياما حلمنا بيه واتمنيناه
وما نلناهوش
ومصر دى نبع الرجال الزين
أهل الأصول
والشهامة
الصابرين الجُمال
لسه ما آنش الأوان برضه
لسه ماجادش الزمان
يكون لمصر
فى رجالتها نصيب
رجالها دايماً لغيرها
وخيرها رايح للغريب
مش دى الكتاف السمرا
اللى تهد الجبال
ودى العيون الذكية والعقول العال
يسافروا يبقوا نجوم و يبقوا شموس
والأم واقف لسه بيها الحال؟
على كل حال
صحّيت فى قلب بلادنا أمانيها
بكرة ابنها المستنيااا يجيها
أنا عندى احساس انه جىّ أكيد
بس الليالى مخبياه ليها
لآنه فجر وله لابد أدان.
........................
حيكون شجاع مايخافش من انسان
ورحيم لناسه وع العدو قاسى
يارب اشوف اليوم دا قبل امّا اموت
باحلم بقائد مش جبان
يرهب عدوه بقوته
اللى قاطفها من الايمان
زى اللى قاطف وردة م البستان
ندرن على قلبى الرُهِيّف ده
لو جه يابلدى لاعشى 100غلبان
واعلق الأنوار فى شباكى
وامسح دموع قلبى اللى عاش باكى
واتمنى اكون له انشا لله خدامه
مداس بلادى أشيله فوق راسى
ولا لى مطلب م الحياة ومراد
غير انى اشوفها على العدو ظاهرة
متخلصة من ذلها وطاهرة
وليها راجل ابن راجل صحيح
ماتهزهوش الريح
ولا تهزموش أحزان
بالحق يدى الحق لاصحابه
بالعدل يعدل كل حال ميلان
ومصر ترجع محور الدنيا
والدنيا دية دايرة حواليها
ماهو ده مكانها اللى اتسرق منها
لما الكلاب اتسلطوا عليها