شواكيش

كُلوا بامية دى الحكومة نايمة!

أقر وأعترف أن الحكومة طلَّعت الغلابة من هدومهم.. وخرجّت الأغنياء من جحورهم!
محمد شاكر وزير «الضلمة واللمبة السهارى» قال: «لما بحس بالحر بقلع الجاكت».. وطبعاً لما يشوف الضلمة يلبس النضارة السودااا!
وزير «العك» المستقيل محفوظ صابر قالها وش: «ابن عامل النظافة لن يصبح قاضياً» كدبوووووه!
على فكرة.. دعوة السفير البريطاني ل «ابن عامل النظافة» للعمل بالسفارة.. لطافة فى زمن النضافة!
وزير التعليم العالى سيد عبدالخالق لما يقول: «من أشاع وجود خلافات بين رؤساء الجامعات.. كداب ونتن وقليل الأدب».. يبقى التعليم العالى.. كيكا ع العالى.. وكيكا ع الواطى!
دعوة حلوة لراغبى التظاهر: عصير القصب أحلى من خرطوش الشرطة.. وإديها «طلقة زعازيع»!
لما الحكومة تخفض الأسعار.. كُل كيس «فيشار».. ومتوقفش الضحكة عندك!
فى عالم الفضائيات: عندنا مذيع «أمنجى».. ومذيع «كلامنجى».. ومذيع «مطبلاتى».. ومذيعة ترقص على «الآلاتى»!
القرد فى عين أمه «غزال».. والغلبان فى عين الحكومة «هذيان»!
إلى الغلبان: خلى البساط أحمدى.. واحرم نفسك من «اللحمة» لحد ما نشوفك تصرخ فى طوابير الزحمة!
الغلبان دلوقتى بيمزمز فى «عضمة الغلاء» والحكومة بتنهش فى لحمه «عض عض»!
فى مولد سيدى الحكومة.. على كتفها تنور.. وعلى جسمها تنور.. وعلى دماغها «تضرب لخمة»!
أبلة «فاهيتا العبيطة» خرجت من شاشة الفُكاهة.. ودخلت «زنقة الستات».. آلووووه يا بوليس الآداب!
الحُب والفساد أطاحا ب 4 وزرا فى المغرب.. والحكومة عندنا ترفع شعار «حُب الاستقالة وحده لا يكفى»!
برامج «التوك شوم» أصبحت زى رقص غلاء الحكومة.. لا اللى فوق شافوها.. ولا اللى تحت عبروها!
جاءنا البيان التالى: من «سيدة المطار» إلى «حمار المطار» يا كلبى لا تنبح!
الحكومة متعرفش تكدب.. إلا فى تصريحات الوزرا ع الهوااااا!
من لغة ولاد الإيه: «متعرفش أنا ابن مين»؟!.. ومن لغة ولاد البلد: «سلطح ملطح وأوعى تفلطح»!
بعد ضبط متسول يمتلك عمارتين.. ورصيد فى البنك 3.5 مليون جنيه يبقى «التسول لينا حق»!
شُبيك لبيك.. الحكومة بين إيديك.. تفطرك «فول» وتغديك «عدس».. وتعشيك على لحم بطنك!
الحقوووونا.. الناس عايزة جنازة وتشبع فيه «لطم».. والحكومة عايزة «بامية» وتشبع فيها «تقميع»!
من أقوال هذا الزمان: قرع الحكومة لما استوى قال: للبامية يا لوبيا!
من ألعاب أطفال اليوم في أسواق الغلاء: «كُلوا بامية.. دى الحكومة نايمة»!
الفساد فى مصر لابس «طاقية الإخفا».. والكبار ماشيين فى الزفة «إغا إغا».. والنصابين بيخلعوا بالملايين «بخا بخا».. والضحايا بيلفوا على دوران الحكومة «لفة لفة»!
آخر شوكشة
فى هذا الزمان.. شوفنا اللى نزل البحر ما تبلش.. واللى رقص على السلالم ومالمش.. والجنيه غلب الكارنيه وطنش.. وعجبى ع الزمن العجبى!