هيثم شاكر يكشف كواليس أول عمل غنائي من ألحان الكابو

حل الفنان هيثم شاكر، ضيفاً على برنامج "معكم" والذي تقدمة الإعلامية الكبيرة منى الشاذلي، والمذاع عبر شاشة Cbc ، إذ كشف بدايته في مجال الغناء وتفاصيل أول أغنية من تلحين الكابو حميد الشاعري .
اقرأ ايضاً .. هيثم شاكر: وفاة والدتي كسرني وحياتي كانت سودة
هيثم شاكر يروي كواليس بدايته الفنية
تحدث هيثم شاكر، عن كواليس أول خطوة في مشواره الفني بمجال الغناء، قائلاً:" لما دخلت الجامعة ابتدى كل اللي غاوي مازيكا يتلم على بعضه، يعني اللي بيغني اللي بيلعب جيتار اللي بيعزف كيبورد واتكوننا شلة، لغاية ما في يوم جالي واحد صاحبي قالي أن فيه شركة إنتاج فتحت جمب بيته بيعملوا شريط كوكتيل وبيدوروا على أصوات جديدة".
وأضاف هيثم شاكر: " هو في البداية كان واخد الموضوع هزار، يعني هو شاف حكيم طالع الشركة فسأل البواب قاله ايه دا هو حكيم ساكن هنا، فراح قاله لا دا فيه شركة إنتاج فوق بيعملوا أغاني ومازيكا".
واستكمل "شاكر"، قائلاً:" "فصاحبي طلع وقالي أنه لقى ناس محترمين جدًا وشركة إنتاج بجد وبيدوروا على أصوات جديدة فاخد رقم المنتج وجابهولي عشان أكلمه وأروح، واخدت الرقم وقعد معايا خمس شهور لأني كنت متردد لغاية ما في يوم كلمته وعرفته بنفسي وقولتله أنا سمعت أنكم بتدوروا على أصوات جديدة قالي اه مظبوط بس فوت شهر وأبقى كلمني تاني".
وتابع:" هيثم شاكر:" فأنا استغربت وقولت أكيد بيفسحني وبيقولي أي كلام فاستنيت شهر وروحت مكلمه تاني قالي اه
فاكرك تعالى بكرا وروحت وغنيت فقالي طيب كويس هنكلمك.. فقولت بس مفيش أمل، فاخدت بعضي وماشي فجه ورايا عند الأسانسير فقالي معلش شركائي عايزين يسمعوا صوتك تاني، وبعدها قالي مبروك أنت معانا وإن شاء الله بنعمل ألبوم كوكتيل هيبقى فيه حكيم وحميد الشاعري وبنقدم 7 أصوات جديدة أنت واحد منهم ويالا بقى عشان نبتدي نسمع الأغاني ونختار".
واضاف هيثم شاكر:" وابتدينا نشتغل على الألبوم، كان حكيم عامل أغنيتين وحميد الشاعري عامل أغنيتين، ولو أوصف فرحتي اد ايه بأن أول أغنية هعملها في حياتي هتبقى توزيع حميد الشاعري ".
وتابع:" أنا مكنتش مصدق، يمكن أنا من الناس المحظوظين في الدنيا أن أنا أول حاجة أعملها في حياتي تبقى من توزيع العبقري حميد الشاعري".
واختتم هيثم شاكر قائلًا: "وبعد ما خلصنا الألبوم كنت عايز انسحب عشان كل الاغاني كانت مقسوم وأنا أغنيتي الوحيدة هي اللي كانت دراما، بس أستاذ فايز قالي أصبر والأغنية هتنجح، وبالفعل الألبوم والأغنية نجحوا".