الحقيقة مصر

واسحلنا باسم ربنا
وإحنا هنعمل نفسنا
ناس من هناك مش من هنا
لا هنفتكر نظام قديم
ولا إنه كان جنبك نعيم
الشعب واخده للجحيم
والاسم مسئول عننا
دلوقتى مابقاش صعب ولا شيء مستحيل
إفهم إيه خلى قابيل قتل بإيديه هابيل
كام مصرى فى عهدك بإيد أخوه قتيل؟
ع الكرسى قاعد شغلتك شد الفتيل
لا بان على بلدى معاك تغيير
ولا شوفنا منك حتى ريحة الخير
قسمتنا جامعة على تحرير
لا حضنتنا ولا شوفنا منك غير
تقدير لناس وناس ولا تقدير
بلدى اللى قاعد فوق وحاكمها
وبلعتها وداير تقسمها
إنت كدا ودا اللى ييجى منك
إنت وجماعتك ميتين ع الحكم
بتتنفسوا الكدب وفى عينكوا اللؤم
ووشكم على بلدنا شؤم
مصر اللى عمرى ماشوفتها فريقين
قسمتها ورايح بشعبك فين؟
فى مصر تانية إحنا ما نعرفهاش؟
وإلا فى غيرنا تانى مصريين؟
كل الحلول فيها بتتأخر
أخرتنا بنرجع ورا أكتر
غير لنا لون العلم يا حاج أنا بقترح كله يكون أحمر
عشان يليق على قتلنا فى بعضينا
بصراحة نهضة بجد هتعدينا
مصر اللى واخدها بنصرة وثورة
بتموت على إيدك وواقفة حزينة
بس إنت ساذج مصر مش هتموت
انت اللى جوه المفرمة هتداس
مصر اللى شايفها ميدان وبيوت
بس الأساس فيها قلوب الناس
الناس هتصحى فى لحظة وهتاكلك
اتعرى أكتر خضنا بشكلك
الموت عشيرتك والخراب أهلك
واحفر بقى قبرك على مهلك
لو كنت خير مين كان يقولك لأ؟
إيه شكلنا كفار وكارهين حق؟
دا إحنا الشوارع واخدة منا راقات
عشان نقول كان للى قبلك لأ
واقفة على سطرى وقلمى اتشل
بقى فى كدا فى الدنيا حقد وغل؟
خربتها ولفيت عليها الحبل
إنت وجماعة بلا ضمير أو عقل
دستور إيه اللى عايزنى أروح وأقراه؟
كام نسبة الأمية ما تقولى؟
طول ما الغطا لا إله إلا الله
عارف أن لعبك كله على جهلى
مين اعترض على وحدانية ربنا؟
من كام سنة فى نفس البلد دى شعبنا
سيدنا النبى موصى على الأقباط
وكانت رسالته رحمة لينا كلنا
هتدخل الإسلام لمصر خلاص؟
يعنى اتلغى اللى دخله ابن العاص؟! بتضعفوا ديننا وشوهتوه
وعلى مقاسكم روحتوا فصلتوه
الانتقام مش بس م المظلوم
دا ربنا ليه انتقام هتشوفوه
وخداكم العزة وواخدكوا الكبر؟
نازلين فى قلب قبوركوا نبش وحفر
افتكروا كل ما يعلى بيكوا الفجر
الليل سواده بينتهى بالفجر
وإن انتوا كدبة والحقيقة مصر
نور عبدالله


العريان يلعب بالنار؟
ثورة يناير في ذمة الله
مرسى والمخلوع وجهان لديكتاتور واحد
من يحشد باسم «الشريعة» في الانتخابات المقبلة؟!
«بديع» يسقط قناع الوداعة عن الإخوان
«الشاطر» يهنئ مسيحيى العالم ويحرمها على أقباط مصر..!