شباك علي الثورة

سعادة السفير جمال بيومي أمين عام اتحاد المستثمرين العرب شفته وسمعته وفهمته وفرحت بيه بسم الله ما شاء الله بقي انتي يا مصر يا محروسة فيكي دا كله ولسه واقفة بتسألي اللي رايح واللي جاي وريني ياابني الطريق أمشي منين علي بلد المحبوب؟ الراجل دا واحد م ولادك الحلوين وما أكثرهم.. راجل عبارة عن موسوعة تمشي علي قدمين اتكلم في علاقات مصر الاقتصادية بجميع دول العالم واتكلم عن العمالة المصرية ماضيها وحاضرها ومستقبلها بلغة جميلة ومحببة رغم جفاف لغة الارقام أنا متأكد ان هذا الرجل سمع حواديت قبل النوم من الأم المصرية بنت ايزيس الحكاءة الخالدة وقابل الشاطر حسن وست الحسن والجمال وأمنا الغولة واليهودي التايه والملك المملوك والكلب أبو سنان دهب وبنت السلطان اللي هربت مع العبد بتاعها واتسببت في موت أمها علي يد أبوها السلطان اللي اتهم الام بالعهر و(اكفي القدرة علي فمها تطلع البنت لأمها). يا دكتور جمال مصر في ثورة وأنا مش عاجبني الوقفة اللي احنا واقفينها دي يا دكتور جمال انت مبعد ليه عن ركب الثوار.. يا مصريين أبوس ايديكم ياللانشتغل ياللانبني مصرنا المحروسة علي هوانا وصدقوني هي مش بعيد عن انها تصبح ست البنات وزينة المحافل وأم الدنيا زي ما قولوا لنا اللي قبلنا إيه رأيك يا دكتور جمال يا بيومي؟. إيه رأيكم يا مصريين؟ مش آن أوان العمل ولا أنا كبرت وبا خرف؟.
***
الشاعر الجميل والصديق الأجمل بخيت بيومي مش عارف أقول لك إيه؟ ونستني وفرحتني وطمنتني علي ثورتنا العظيمة المنصورة بإذن الله الأصالة اللي بتكتب بيها في »الوفد« بتخلي حروفك منورة علي شمعة الفرح أخجلتني يا صديقي العزيز وطمنتني علي المروءة المصرية والجدعنة المصرية، والله بلدنا لسه بخير يا بخيت وحتفضل مصدر الخير لكل البشرية زي ما كانت علي طول الزمان احتمال دلوقتي وهي عاملة أجمل وأعجب ثورة في تاريخ البشرية وقاعدة في الكوشة تحت الطرحة وجواه فستان الفرح يارب تمت بخير.
***
المجلس الأعلي للقوات المسلحة ولادنا وأخواتنا اللي قايمين نايمين علي حماية مصر المحروسة وثورتها العظيمة وأحياناً بيزهقوا من دلع المصريين اللي عاملين ثورة وماشيين في الشارع صدقوني مصدر كل الشرور والمخاوف هو وضع حسني مبارك وعائلته في شرم الشيخ وكمان خروجه علينا بكلام زي وسخ الودان من خلال قناة العربية التي يملكها النظام السعودي حليفه القديم وشريكه في مهزلة ما سمي ب(معسكر الاعتدال) والمعروف ان نظام آل سعود الوهابي لا يحب مصر والمصريين بعد أيام ابراهيم باشا ما راح ودق دماغهم في الجزيرة العربية بس يعني ده مجرد ملاحظة.. وخلاص.