بالفيديو.. استشاري يقدم طريقة علاج مُصابي كورونا في المنزل

نصح الدكتور "ناصر رمزي"، استشاري طب الأطفال والاحتياجات الخاصة وطب الأسرة، في فيديو مختصر عبر صفحته الشخصية على موقع التواصل الاجتماعي الأشهر "فيسبوك"، بكيفية علاج حالات فيروس كورونا الإيجابية في المنزل، بُمجرد أن تُثبت نتيجة اختبار فحص كورونا إيجابية الحالة وإصابتها بفيروس كورونا.
ظهر الدكتور "ناصر رمزي" في الفيديو و هو ينصح متابعيه قائلاً: "يتم التحليل في أي مستشفى أو معمل تحاليل متخصص عن طريق تحاليل عدة منها تحليل الcbc، و إذا كانت أوضحت نتيجة التحليل أن كرات الدم البيضاء قليلة، وأن ما يُسمى بabsolute lymphopenia قليلة، وتحليل "D dimer" عالي، إضافة إلى كل ذلك كانت مسحة الكورونا التي قمت بها نتيجتها إيجابية، ففي هذه الحالة أنت مُصاب بفيروس كورونا".
وأضاف: "وبُناءً على نقص الأماكن في مستشفيات العزل، إذا لم تكن منعدمة، فلابد من ضرورة وسرعة العلاج في المنزل، حيث إنك بمجرد ما تحصل على نتيجة مسحة كورونا وتكون إيجابية، لابد أن تقوم على الفور بإرسال التحاليل لوزارة الصحة، ومن ثم يرسلون إليك العلاج المطلوب بحسب البروتوكول الطبي الخاص بحالتك المرضية.
ثم قام بتوضيح تفاصيل البروتوكول العلاجي لمُصابي فيروس كورونا بالمنزل قائلاً: "هقولكم البروتوكول و عليه زيادات من عندي واجتهادات شخصية كنت عالجت بيها ناس في خلال شهرين منذ بداية الأزمة مصريين في مصر وخارج مصر و تواصلت معاهم عبر تطبيق "الواتس آب" وتم إثبات نجاح هذه الخطة العلاجية".
و بدأ في وضع البروتوكول العلاجي قائلاً: "أولاً وزارة الصحة بتبعتلك حاجتين من عندهم لو هيبعتولك اي علاج ، أقراص "الكلوروكين فوسفات" وده بتاخد قرصين في أول يوم، ثم قرص يوميًا لمدة 5 أيام، ولكن الأقراص دي بطلوا يبعتوها تقريبًا نظرًا للأضرار الكتيرة والمضاعفات والآثار الجانبية اللي بتسببها و اللي بتحصل في البيت، وتاني حاجة بيبعتولك كبسولات "تاميفلو" التي تعالج انفلونزا الخنازير، وبتاخد كبسولة كل 12 ساعة لمدة 5 أيام".
ثم أضاف: "بتاخد معاهم مضاد حيوي مجموعة "الآزيثرومايسين- Azithromycin" ودي بتشمل كبسولات "زيثروماكس"، "زيثرون" أو "زيسروسين" أو "زيثروكان" أو "أزروليد" أو أي نوع منها بتاخد 500 مجم، كبسولة واحدة يوميًا 500 لمدة 5 أيام.
"وبتاخد قرص "بانادول 500 مجم" كل 6 ساعات ، و أهم حاجة الفيتامينات، كبسولة فيتامين "C" "ريتارد 500" كل 6 ساعات، أو قرص "فيتاسيد ج فوار 1000 مجم" كل 12 ساعة.
و أوضح ضرورة عنصر "الزنك" و "مُسيلات الدم" في البروتوكول العلاجي قائلاً:
"بناخد أيضًا "الزنك"، كبسولة الزنك مثل "أوكتي زنك" أو أي نوع كبسولة مرتين كل 12 ساعة، و بناخد كمان أهم حاجة "مُسيلات الدم"، حسب ما أخبرني أحد أصدقائي المُصاب بفيروس كورونا، عندما كان يشعر بألم شديد في الصدر، لم يشعر بتحسن إلا عندما تناول قرص أسبوسيد للأطفال، ف لذلك بأكد للمرة التانية مهم جدًا آخد مسيلات الدم خاصًة مع كبار السن ، و ذوي الأمراض المزمنة مثل أمراض "الربو والقلب والضغط والسكر"، باخد قرصين "أسبوسيد للأطفال" يوميًا مضغ بعد الغذاء، واللي عنده مشاكل مع الأسبرين بياخد بديل الاسبرين اللي هو مسيل الدم أقراص اسمها "كلوبيكس" قرص يوميًا بعد الغذاء.
و استكمل بروتوكول العلاج الخاص به قائلاً: "أنا يُفضل أيضًا ناخد فيتامين "ه" و ده مضاد للأكسدة ويُعيد بناء الخلايا، بناخد كبسولة يوميًا 1000 مجم أو كبسولة يوميًا 400 مجم أي حاجة"، إلي جانب فيتامين "D" قرص "أوسوفورتين" "القرص 10 آلاف وحدة أو ربع مجم" قرص يوميًا كل يوم، بالإضافة إلي كبسولات "أوميجا 3 بلس" وده بناخد منه كبسولة مرة أو مرتين في اليوم".
و استطرد كلامه قائلاً:"عند الإحساس بصعوبة في التنفس ونهجان و كرشة نفس، ممكن نشتري جهاز البخار "نيبولايزر" ويفضل نوع إيطالي وبتكون تكلفته حوالي 300 أو 400 جنيه، ونعمل جلسات بخار كل 6 ساعات ، وبنجيب محلول ملح 500، مع امبول اسمه "بلميكورت 500 مجم" و امبول اسمه "اتروفنت 500 مجم "، ونعمل جلسة من دي و جلسة من دي كل 6 ساعات بالتبادل، الأمبول علي 3 سم محلول ملح، وبنعمل 4 جلسات تقريبًا في اليوم مما يساعد علي تفتيح الشعب الهوائية".
وأضاف: "ياريت نجيب بالونة و ننفخ فيها لأن ده بيقوي القدرة والكفاءة والسعة بتاعة الحويصلات والشعب الهوائية وبنعتبرها كمان تمارين للصدر و رياضة للشعب الهوائية".
وأضاف أيضًا: " إذا كان عندي كحة جافة باخد "توسيفان شراب" ، "توسيفان ن شراب" ، "كوديلار شراب"، "كوديفان شراب"، "سيرينول شراب"، معلقة كبيرة 3 أو 4 مرات يوميًا، أما في حالة إذا كانت الكُحة مصحوبة ببلغم، يُفضل إننا ناخد شراب الأعشاب "برونشيكم" ، "فاست" ، شراب جوافة، "ايفيبرونت" معلقة كبيرة 3 أو 4 مرات يوميًا ، بالإضافة إلي أكياس اسمها "أسيتايل سيستايين" مُذيبة و طاردة للبلغم، الكيس 600 مجم، باخد كيس مرتين في اليوم.
و نصح أيضًا بعض الحالات الحرجة قائلاً: "يلجأ رؤساء العناية المركزة في الطواريء في أمريكا، و أنا أوؤيد هذه النصيجة أيضًا وأنصح بيها، في حالة وجود صعوبة في النفس و كرشة نفس و تقل في الصدر ونهجان، ولم نشعر بتحسن رغم كل العلاج اللي خدناه ده مع البخار، بنضطر نلجأ لل "كورتيزون"، بناخد أقراص "هوستا كورتين" 5 مجم، قرص كل 12 ساعة لمدة 5 أيام و لاداعي للخوف من تناول الكورتيزون تمامًا".
و اختتم دكتور "ناصر رمزي" نصيحته قائلاً: "بنعمل عزل في البيت، وبنلبس الكمامة في البيت، و بنعمل عزل عن أي مُصابين عشان ميحصلش تخالط، ضرورة النوم في غرفة جيدة التهوية، التغذية الجيدة، وإذا شعرنا بعدم القابلية للأكل ممكن نعلق محاليل مثل محلول "رينجر 500" و محلول ملح، كل 12 ساعة".
" أما في حالة الإسهال، بناخد "نانازوكسيد" أو "نيتازوكسانيد 500" كبسولة كل 8 ساعات أو كل 12 ساعة، و في حالة شعرت بألم و مغص في بطني باخد مضادات المغص والتقلصات مثل أقراص "باسكوبان" أو "فيسرالجين"، قرص 3 مرات في اليوم.
وأضاف: "يبقي أنا كده خدت العلاج كله و هستمر في قرص العلاج ده يوميًا، و أهم حاجة في العلاج قلتلكم عليها وبأكد تاني هي سيولة الدم أحافظ عليها عن طريق قرصين الأسبوسيد بعد الغذاء أو البديل له قرص "الكلوبيكس" كل يوم، سواء جالي بروتوكول وزارة الصحة أو لا، وسواء بتاخدوا كلوروكين فوسفات أو تاميفلو أو مبتاخدوش ، شوفوا ايه الكلام الي أنا ضفته علي بروتوكول وزارة الصحة وضيفوه عليه.
و طلب دكتور "ناصر رمزي" من كل شخص يشاهد الفيديو أن ينشر الفيديو في كل مكان و يجعله يلف العالم كله قائلاً: " لازم كل الناس تستفيد من الفيديو ده و كل الناس تشوفه و أنا بطلب من كل شخص ينطق و يفهم اللغة العربية يعمل شير للفيديو علي صفحته الشخصية مش كفاية تشوفه انت لوحدك انا بتعب وبقولك بروتوكول العلاج الصح عشان تستفاد بيه انت و غيرك، لأن في ناس كتير مرضي في بيوتها و مش عارفين يتعالجوا ازاي و مفيش أماكن ليهم في مستشفيات العزل فبالتأكيد الفيديو ده هيساعدهم جدًا في بروتوكول العلاج الصح اللي المفروض يمشوا عليه".
و اختتم الفيديو بملاحظة أخيرة قائلاً: " عندما تحدث عدوي في أي مكان مش شرط نقفله 15 يوم ممكن نعقمه تعقيم جيد و يتقفل بس يومين لمدة 48 ساعة وبعد كده يتفتح تاني عادي،و ناخد بالنا بس من المخالطين للمصاب أما الباقيين كلهم اللي بعيد عنه مفيش منهم مشكلة، واتمني من الله أن يرفع غضبه عنا ويرفع الوباء والبلاء و يشفي كل مصاب وكل الإنسانية، و الي اللقاء في فيديو طبي قادم".