شباك علي الثورة

تغيير نشاط

صفاء أبو السعود "سابقاً" شفتي ازاي؟ أهي الأيام دارت والزمن اتورب وأصبحت الآن قادراً علي أن أرد لكي الاساءة بما هو أسوأ منها لكن علشان خاطر عيون هديل الجميلة عفا الله عما سلف وعلي رأي المرحومة أمي هانم عليها السلام "تكفي العايب عيبته".
***
ياخويا بعض الناس فهموا الثورة غلط وكأنهم لا شافوا شباب في عمر الزهور بيسقط مضرجا بدمه الزكي الطاهر ولا شهداء بيلقي بهم في صناديق القمامة ولاعيون صاحية بيفقأها رصاص الشرطة والجيش المصري مع الأسف ولا بنات بيسحلهم صناديد الجيش المصري في الشوارع والميادين العامة ولا ولا واحد حيسألني.
امال شافوا ايه يافاجومي
ح أقول له:
شافوا أنفسهم بس يا ابن عمي
حيقول لي:
مش فاهم يعني ايه شافوا أنفسهم بس؟
ح أقول له:
يعني اللي كان شغال نجار طبالي بدأ يستعد ويأهل نفسه عشان يبقي نجار أفرنجي بدل الطبالي والقباقيب حيبقي نجار موبيليا أفرنجي وتعيش الثورة وحتي المبدعون أو بعضهم فهم الثورة علي أنها مجرد تغيير شوية تعبيرات في الدراما تخلي الراكب يبقي مركوب وتحول المظلوم الي ظالم ومفتري وابن ستين في سبعين يعني المهم تتغير القفلة والغالب يصبح مغلوب وآدي ياسيدي الثورة عند الدراما ثورجية والمخرجين والممثلين والملحنين والمغنواتية لكن كله كوم ومحمد منير كوم! قبل الثورة جاني بالليل في حوش آدم ياخد مني تنازل علي أغنية اسكندرية وكتب لي شيك بمبلغ ألف جنيه علي بنك في شارع البطل أحمد عبدالعزيز في المهندسين أنا في الوقت ده كنت أحتكم في جيبي علي مبلغ محترم عبارة عن ثمانية وعشرين جنيه وحوالي سبعتاشر قرش ليلتها مانمتش من فرحتي والصبح قمت خدت تاكسي وع المهندسين واذا بي أفاجأ بأن الشيك بدون رصيد! ورجحت بخفي حنين بعدما فرتكت المبلغ رايح جاي وقد نصحني بعض الأصدقاء بإبلاغ النيابة العامة، إن أبلغ النيابة العامة وفي محمد منير اللي أنا باحبه مستحيل طبعا ودا كان قبل الثورة تعالي بقي بعد الثورة نشوف محمد منير غير نشاطه ازاي.
باقلب في القنوات لقيت قناة النهار وعليها الأخ منير بيغني اعلان مصور عن محو الأمية بيقول:
ياللي اتحرمتوا من التعليم
الفرصة لسه قدامكم
من غير ما تدفعوا ولا مليم
إذاعتنا ناوية تعلمكم
يعني عمل وطني أهه بس ما قالش ان دي كلمات أحمد فؤاد نجم وألحان الشيخ إمام ليه كده يامنير؟!