بهجت قمر لمهاجمي تعاقدات تركي آل الشيخ: بقينا بغبغانات.. ووفاء عامر ترد: سلمت يداك

أعرب الشاعر الغنائي أيمن بهحت قمر، عن غضبه من منتقدي التعاقدات الفنية التي أعلن عنها المستشار تركي آل الشيخ رئيس هيئة الترفيه السعودية.
وكتب عبر حسابه الرسمي بموقع التواصل الاجتماعي "فيبسبوك": "أنا مستغرب جدًا من الناس اللي زايطين ومتضايقين أوي من تعاقدات الفنانين مع هيئة الترفيه السعوديه واللي بيمثلها المستشار تركي آل الشيخ وعمالين يشيروا الصور وبيغلطوا أو بينظروا أو سايبين اللي عندهم يعلقوا ويغلطوا".
وأضاف: "ايه المشكله مش فاهم ! لا هي عقود احتكار ولا هي تنازلات أو بيع تراث مثلا ولا فيه أي ذرة اهدار كرامة أو ذل زي ما بعض الموتورين كاتبين ومعظم للي كاتبين أساسًا مش فاهمين الناس
دي اتفقت على ايه! اي فتي وخلاص يعني، دي تعاقدات على أعمال مسرحية وحفلات وإنتاج مسلسلات وده أنا بعتبره تقدير منهم لدور الفن المصري وصناعه وتأكيد على مكانته في قلوب الشعب العربي وفي نفس الوقت هيساهم في تقديم فن على مستوى عالي بسبب دعمهم".
وتابع: بعدين هو إنت لما خالك وإلا انتي لما جوزك يعمل صفقة كرفس مع مستثمر عربي في البدرشين يبقى عادي ومبروك يا روحي لكن لو فنان مصري مضى عمل باحترام وكرامه أو حضر مؤتمر بقيمته اللي تليق بيه ومع أشخاص
على أعلى مستوى في بلدهم تقعد تغلط في الفنان ده وتصغره وتقول انه باع نفسه ! باع نفسه لمين وزعلان على ايه مش فاهم!".
واختتم: "رجع يابابا القضاه والدكاتره والمدرسين من بلاد الخليج مادام هي كده،، وقف أي مستثمر عربي بيعمل حاجه في البلد واللي عمل رجع له اللي عمله، البلاد العربيه بتقدرنا وبتكبرنا وانتوا بتصغروا فينا والله،، عيب عليكوا والله بقينا بغبغانات!.
وردت الفنانة وفاء عامر قائلة: صحيح، و نذكر ان الفن و صناعة هو جزء من البيوت الكبير و جزء من حجم كبير، سلمت يداك.
جدير بالذكر "آل الشيخ"، وقع مؤخرًا عددًا من الاتفاقيات الهامة في مجال الترفيه، بحضور نخبة من الفنانين الكبار على رأسهم الفنان عمرو دياب، رجاء الجداوي، محمد هنيدي، عمرو أديب، محمد حماقي، يسرا، أشرف عبدالباقي، والشاعر أيمن بهجت قمر، عمرو مصطفى، بالإضافة إلى عدد من الفنانين.