أيمن بهجت يعلن تمرده على مصر

أعلن الشاعر الغنائي أيمن بهجت قمر رفضه استجابة المبادرة التي أطلقها الرئيس عبدالفتاح السيسي، والتي استجاب لها البعض وكان مضمونها «صبح على مصر ولو بجنيه».
بهجت أعلن تمرده على حسابه الشخصي: «أنا مش هشارك، لا بتبرع يروح منه نسبة لشركات الاتصالات والصناديق اللي بيشرف عليها رجال أعمال ولا حتى هشارك بعمل فني تاني للبلد مادام البلد دي مابتحميش حقوقي وحقوق ولادي ولا بتحترمني.. وشكرا».
وبعد الانتقادات التي تعرض لها وخاصة أنه مؤلف أغنية «بشرة خير» قال: «عادي إنك تحب الرئيس أو إنك تكون بتأيده وإنك تختلف معاه.. أنا ربنا خالقلي عقل ومش هقبل إني أكون من نوعية ناس اتعودوا يلاقوا الريس يقول حاجة هوب تلاقي كله بيرددها وراه وبحماس منقطع النظير.. لكل فعل رد فعل، والغريبة إن فيه قطيع قصدي قطاع من الناس ابتدى شوية منهم يشككوا في وطنيتي وشوية تانيين زايطين من مدعي الثورية المراهقين أو من الإخوان إن مؤلف بشرة خير يئس ومحبط!.. قمة الجهل والسطحية بصراحة وكإننا لازم نفضل نهلل لجانب واحد طول الوقت ولازم نمدح أو ننتقد طول الوقت.. عموما أنا هفضل أقول رأيي وقت ما أحب و ولا حد هيزايد عليا ولا هيعلمني أقول إيه وما أقولش إيه».