أمير طعيمة يساند صديقه أيمن بهجت قمر فى أزمته ويستشهد ب "الهضبة

ساند الشاعر أمير طعيمة، صديقه الشاعر أيمن بهجت قمر، فيما يتعرض له في الفترة الحالية من هجوم شديد عليه والتشكيك في ضميره وأخلاقه الإنسانية.
حيث كتب أمير عبر صفحته الشخصية عبر موقع التواصل الاجتماعى فيس بوك : انا بره مصر و رغم كده مش قادر استني لما ارجع عشان أقول الكلام اللي هقوله دلوقتي و هقول مقدمة بقولها لأول مرة بس ده وقتها:في أواخر سنة 1999 قابلت السوبر ستار عمرو دياب لأول مرة لما كنا شغالين في أغنية العالم الله و أغنية اعمل أيه، و كنت إلي حد ما مش فاهم عمرو و ده طبيعي في أول تعامل فيه شخص كان له دور كبير انه يفهمني مفاتيح التعامل مع عمرو و بسببه خلصت الأغنيتين دول و اللي أكيد كان ليهم دور كبير في معرفة الناس بيا الشخص ده اسمه أيمن بهجت قمر، كان ممكن يضلني و كان ساعتها ممكن هو اللي يكتب الأغنيتين دول لأن عمرو كان استقر علي اللحنين و نفذهم، بس عشان هو ابن اصل و ابن العظيم بهجت قمر وقف جنب واحد بقي من أقوي منافسيه بعد كده، و من ساعتها و هو أخويا و صاحبي و حبيبي و من أرجل الناس اللي عرفتهم في حياتي .
وتابع: طبعا عندكم فضول تعرفوا المقدمة دي ليه، أقولكم: أيمن بيتعرض بقاله مده لهجمة شرسة و حقيرة من بعض المرضي النفسيين، تشكيك في ذمته و تدخل في حياته شخصية و وساخات و تجاوزات مقرفة (طبعا ما بيشككوش في موهبته لأنه مش محتاج تقييم من أي حد) .
واضاف: أخويا و صاحبي ايمن بهجت قمر: فنيا قلتها و هقولها تاني: أنت من أفضل الشعراء في تاريخ مصر و الوطن العربي مش بس في جيلك و دي حقيقة ما ينكرهاش إلا جاهل او حاقد، و كسيناريست عملت أفلام مع أعظم نجوم جيلك، و انا شخصيا بشوف ان فيلم زى أسف علي الإزعاج هيبقي من علامات السينما المصرية و غيرها من الأفلام اللي كسرت الدنيا .
وواصل: شخصيا: أنت من انضف و أفضل و أجدع و أرجل الشخصيات اللي قابلتها في حياتي و بتشرف ادام الناس انك صاحبي، نصيحة من أخوك: كمل في طريقك و أي حشرة هتقابلك في طريقك دوس عليها بحزمتك و كمل، أنت مش محتاج مني و لا من غيري تزكية، أنت فنان عظيم ابن فنان عظيم، و كل اللي عارفينك عارفين أنت مين و عملت مع كل الناس ايه، أما سمعتك فأظن انها سابقاك و أي كلام هقوله مش هيبقي ليه معني .