تعظيم سلام للشباب

تعظيم سلام للشباب
تعظيم سلام للشهيد
النهارده يوم جديد
النهارده يوم جديد
يا زمان.. أرجوك توقف
يا تاريخ.. أرجوك تسقف
للشباب اللي كسر.. كل القيود
للشباب اللي عبر.. كل الحدود
يا تاريخ ارسم بريشتك
لوحة النور والفخار
يا شهيد طُل بجناحك
طلع النهار.. دار المدار
شمس النهارده.. لون جديد
ضيها مليون نشيد
بيقوله أطفال الوطن
لحن وشجن
يا كل طفل من النهارده بيتولد
من بطن أم مأصلة
رضعت أصول المسألة
ارضع شجاعة ومرجلة
ارضع جلد
يا كل أم وكل أب
بعد النهارده.. متخافوش
أولادكو رجالة ووحوش
أولادكو ردولكوا الجميل
أولادكو صنعوا المستحيل
يا كل مظلوم انقهر
الظلم ولي وانصهر
إياك تفرط م النهارده
في أي حق من الحقوق
الجُبنا دخلوا في الشقوق
يا كل شرفاء البلد
في كل موقع في البلد
حاربوا الفساد.. اللي سري
في كل أنحاء البلاد
في كل شرايين الجسد
يا كل شاعر في الوطن
اكشف فساد عهد العفن
اطلق بارودة كلمتك
ع اللي ظلم.. واللي سجن
كسر قيود المستحيل
سجل بنجاح ثورة شباب
في كل صفحات الزمن
تعظيم سلام للشباب
من كل أبناء الوطن
*رئيس جمعية الأدب العربي