فيس بوك: فاكرين المصريين بالخارج بيغرفوا الدولارات من البحر

"فاكرين المصريين في الخارج بيغرفوا العملة الصعبة من البحر".. "جاتكوا خيبة في خططكم ومشاريعكم".. كان هذان التعليقان لأحد النشطاء على موقع التواصل الاجتماعى "فيس بوك" تعليقا على تدشين رئيس الوزراء الدكتور كمال الجنزوري مبادرة على شبكة الإنترنت خاصة بطرح أراض بالمدن الجديدة للمصريين بالخارج تحت اسم " بيت الوطن ".
وجاءت تعليقات النشطاء كما يلى:
- انتوا عالم مستفزة .. وفاكرين المصريين في الخارج بيغرفوا العملة الصعبة من البحر .. ولا إنتوا فاهمين حاجة وإن شاء الله حانغير الوزارة الفاشلة اللي عمالة تهّلب فلوس المصريين برّه وجوّه .. وحقنا مش حانستناه لما تديهولنا .. حقنا حانجيبوا بإيدنا في صناديق الانتخابات .. ولا علشان معندناش في الغربة ميدان تحرير حاتشتغلونا .. اللي فاكر ان المصري اللي قاعد بره معاه الملايين ديه .. يبقى أصلا ميعرفش إنه مصري ونفسه يرجع بلده .. ولو معاه عشر الملايين ديه ما حايضيع لحظة في الغربة .. جاتكوا خيبة في خططكم ومشاريعكم.
- بالله عليكم هل باعتقادكم أن الشعب المصري ساذج للدرجة دى علشان تبيعوا المتر ب500 دولار ولا انتو عاوزين تبيعوا العتبة الخضراء ليهم ومن قبل قمتم ببيع المتر بجنيه واحد لطلعت مصطفي اتقوا الله.
- اذكروا الله فعلا والله لو معانا كل الفلوس دى ماكنا اتغربنا ياسيادة رئيس الوزراء حضرتك متخيل اللى بيعملوا بالخارج وزراء او أمراء او حتى رجال أعمال ارجوكم محتاجين نشعر ان فيه ثورة حقيقية ضد الظلم والفساد والغلاء نفسنا نرجع بلدنا ونعمل ونجتهد فى بلدنا على الاقل مجهودنا وتعبنا يكون لبلدنا يابشر افهمونا أرجوكم.
- المفروض يسموها هيئة مجتمعات الحرامية ، مش هانقدر ندفع الاسعار الوهمية دي غير لو سرقنا .