فيها حاجة مش حلوة2

طبعا في يوم من الأيام كنت طفلا صغيرا.. وكانت الدنيا جميلة والناس بتحب بعضها لأن مصر كانت حلوة فعلا.. وكلمة حلوة أنا مُصرّ عليها لأنها تحمل كل المعاني الجميلة.
مصر أرض الخير.. كانت الشمس طول العام والنيل بيجري يغمر الغيطان في كل مكان اللي دمرها العسكر وبنوا عليها العمارات والعشوائيات.
مصر الزراعة.. كانت الشادوف الساقية والنورج والفأس وزهور القطن وعود القصب وسنبلة القمح وشجرة البرتقال وغيط الذرة وحبة الطماطم.
مصر النيل والمركب الشراعي وصندل البضاعة وبلاص العسل وفسحة الكورنيش وفلوكة عم صابر الصياد وجزيرة الدهب والمنيب والمنيل وكوبري قصر النيل ومعدية الباجور.
مصر السياحة.. شط اسكندرية وقناة السويس وتمثال ديليسبس والترعة الحلوة وكوبري جميل وشاطئ بورسعيد وخير بحيرة المنزلة ومراسي البرلس.
مصر الجمال.. أم وشوش مبتسمة وعيون كحيلة ومشية الغزال ونخلة البلح وعمود السواري وقلعة ابراهيم وميدان المنشية والقلة الساقعة علي سور التراسينة.
مصر الحضارة.. الهرم وأبو الهول ومومياء رمسيس وقناع نفرتيتي والبر الغربي وجزيرة النباتات وبحر أسوان.
مصر عبق التاريخ.. الحلوة بشوارعها وحواريها وخان الخليلي وقهوة الفيشاوي وتحت الربع والفحامين والنحاسين والسبحة والشيشة وجامع الحسين والسيدة زينب وخلوة السيدة نفيسة يا عيني علي شموخ الأزهر ودار الكتب والمتحف المصري والمجمع اللغوي والمرحوم المجمع العلمي.
مصر العلم.. المدرسة والحوش وحصة الموسيقي وجماعة التمثيل والقسم المخصوص وملعب كرة السلة وترابيزة البينج بونج وجماعة الكشافة وساعة الفسحة ولما يضرب الجرس نقف طابور ونرفع العلم ونقول تحيا مصر.
مصر الكفاح.. شباب معركة الإسماعيلية وفدائيي القنال وأبطال معركة بورسعيد 56 وهزيمة العسكر وكسر نفس المصريين في 67 وعبور 73 وثورة 25 يناير 2011.
مصر الأمن.. كان عسكري الدورية أبوصفارة المحترم، وكناس البلدية أبو عجلة ومقشة وزمبيل وشيخ الحارة وحاوي القرية وصندوق الدنيا ودكان عم حسن بتاع العسلية وزريبة أبوجبل وحوش عيسي واللمبة الجاز وابور الجاز بريموس.
مصر القرية.. كانت بلاص العسل وبنات القرية وهما حول حنفية المية والساقية وناي الغلابة وزقزقة أبوفصادة وعصفور الجنة وريحة الفل والياسمين والتمرحنة والفراخ الفيومي والبلدي أم دقة ودكر البطل أبو عرف أحمروفطيرخالتي زنوبة وفتة كوارع أبوحسين.
مصر الفن.. أم كلثوم والأطلال وجندول عبدالوهاب وسيد درويش والعشرة الطيبة.
مصر المسرح.. يوسف وهبي وعطيل وأمينة رزق وعبدالمنعم إبراهيم وإسماعيل ياسين ومدبولي والمهندس وزكي طليمات.
مصر الأدب.. نجيب محفوظ والحكيم والشرقاوي وجائزة نوبل وأولاد حارتنا وسي السيد وزقاق المدق وبين القصرين وقصر الشوق والسكرية.. نعمان عاشور والناس اللي تحت.
مصرالفكاهة.. الريحاني كشكش بك وأبوحلموس وماري منيب وعدلي كاسب وشرفنطح والقصري والقصبجي وفاطمة رشدي وكازينو بديعة.
مصر زكي رستم وحسين رياض وحليم وشادية وطلب والأطرش وكمان شفيق جلال.
مصر الرياضة.. الوحش وصقر والضظوي ومختار التتش وحسن شحاتة.
مصر كانت أم الدنيا.. أم حسين وبهانة وعبدالموجود وإسماعيل بن ستوتة ومرقص وبشاي وميخائيل والقمص بطرس.. مصر كانت كل الحب، كل الفن، كل الجمال، كل الهنا.
مصر الأمان.. كانت الحصن والملاذ والكلمة الحلوة وابن البلد اللي خلف ولد وطار في الهوي شاشي يا جدع من روح سيد مكاوي وصلاح جاهين والليلة الكبيرة.
كل اللي فات راح وانقضي من خلال ممارسات العسكر لمدة ستين سنة،. ضاعت الأرض واختفي الزرع واتسرطن الأمل وخربت المدارس وضاعت التلامذة وتاه المواطن بين المستشفيات بلا فاعلية وغرقت الطرقات بالمجاري وفقدت الأخلاق وزادت البلطجية.
انكسرت عجلة كناس البلدية وغرقت فلوكة عم صابر وتلوثت البحار والأنهار وسرقت الآثار وكثرت العشوائيات وجاعت الغلابة ونهبت الميزانيات وكثرت العمولات واغتنت الحرامية واغتني لصوص أموال الشعب المصري الطيب.
بكت التماثيل في المتاحف والميادين علي حال مصر.. وكان الشعب المصري يئن صامتا تحت وطأة الأمن المركزي وظلم وأمن الدولة وجبروت وعملاء النظام فكان يهرب الي الجامع والزاوية ليدعو الله أن يرحمه من ظلم البشر.
فجأة مصرالثورة.. قالت كلمتها في 25 يناير وطردت الطاغية والطغاة وفرحت وفرحنا معاها ولكن للأسف أجهضت الثورة وضاعت وتاه الثوار وصال وجال الحرامية والبلطجية وزبانية الكلة والبنزين وزاد الخراب بفعل اللهو الخفي.
مصر تبات وتصحي علي اجتماعات وقرارات ولجان ووزارات وطوب وزجاجات مولوتوف وقنابل ورصاص.. وبعد كده تلاقي تصريحات ومشاورات فشنك.
مصر تبات وتصحي علي آهات وكلام الطاغية المخلوع!! يدور في دماغها عندما قال يا أنا يالفوضي.
يا خوفي عليكي يا مصر.. يا حتة من عقلي وقلبي.. يا طفولتي وشيخوختي.. يا عيني عليكي يا بنتي!! عايشة في سواد ودخان وآلام وعدم أمان.. كان نفسي تعيش طفولة وشبابي أيام مصر الحلوة.
خايف أموت قبل مصر ما ترجع حلوة من تاني.. ويغور في ستين داهية حكم العسكر واللهو الخفي.
------------
المنسق العام لحزب الوفد