فيها حاجة مش حلوة

طبعاً في يوم من الأيام كنت طفلاً صغيراً.. وكانت الدنيا جميلة والناس بتحب بعضها لأن مصر كانت حلوة فعلاً.. وكلمة حلوة أنا مُصر عليها لأنها تحمل كل المعاني الجميلة.
مصر أرض الخير.. كانت الشمس طوال العام والنيل ببحري يغمر الغيطان في كل مكان اللي دمرها العسكر وبنوا عليها العمارات والعشوائيات.
مصر الزراعة.. كانت الشادوف الساقية والنورج والفأس وزهور القطن وعود القصب وسنبلة القمح وشجرة البرتقال وغيط الذرة وحبة الطماطم.
مصر النيل.. كانت نهر النيل والمركب الشراعي وصندل البضاعة وبلاص العسل وفسحة الكورنيش وفلوكة عم صابر الصياد وجزيرة الدهب والمنيب والمنيل وكوبري قصر النيل ومعدية الباجور.
مصر السياحة.. شط اسكندرية وقناة السويس وتمثال ديليسبس والترعة الحلوة وكوبري جميل وشاطئ بورسعيد وخير بحيرة المنزلة ومراسي البرلس.
مصر الجمال.. أم وشوش مبتسمة وعيون كحيلة ومشية الغزال ونخلة البلح وعمود السواري وقلعة ابراهيم وميدان المنشية والقلة الساقعة على سور التراسينة.
مصر الحضارة.. الهرم وأبو الهول ومومياء رمسيس وقناع نفرتيتي والبر الغربي وجزيرة النباتات وبحر أسوان.
مصر عبق التاريخ.. الحلوة بشوارعها وحواريها وخان الخليلي وقهوة الفيشاوي وتحت الربع والفحامين والنحاسين والسبحة والشيشة وجامع الحسين والسيدة زينب وحلوة السيدة نفيسة يا عيني على شموخ الأزهر ودار الكتب والمتحف المصري والمجمع اللغوي والمرحوم المجمع العلمي.
مصر العلم.. المدرسة والحوش وحصة الموسيقى وجماعة التمثيل والقسم المخصوص وملعب كرة السلة وترابيزة البينج بونج وجماعة الكشافة وساعة الفسحة ولما يضرب الجرس نقف طابور ونرفع العلم ونقول تحيا مصر.
مصر الكفاح.. شباب معركة الاسماعيلية وفدائيون القنال وأبطال معركة بورسعيد 56 وهزيمة العسكر وكسر نفس المصريين في 67 وعبور 73 وثورة 25 يناير 2011.
مصر الأمن.. كانت عسكرية الدورية أبو صفارة المحترم، وكناس البلدية أبو عجلة ومقشة وزمبيل، وشيخ الحارة وحاوي القرية وصندوق الدنيا ودكان عم حسن بتاع العسلية، وزريبة أبو جبل، وحوش عيسى واللمبة الجاز ووابور الجاز بريموس.
مصر القرية.. كانت بلاص العسل وبنات القرية وهما حول حنفية الميه والساقية ونادي الغلابة وزقزقة أبو فادة وعصفور الجنة وريحة الفل والياسمين والتمر حنة والفراخ الفيومي البلدي أم دقة ودكر البط أبو عرف أحمر وفطير خالتي زنوبة وفتة كوارع أبو حسين.
مصر الفن.. أم كلثوم والأطلال وجندول عبد الوهاب وسيد درويش والعشرة الطيبة.
---------
المنسق العام لحزب الوفد