شكاوى فيتيس "تويوتا" فى منتدى نايل موتورز

طفت على السطح المشكلات التى يعانى منها ملاك السيارات منذ ظهور المنتديات على شبكة الإنترنت ..وأصبح الجميع ينتظر الخبرات ممن سبقوهم فى التعامل مع توكيلات السيارات..ومؤخراَ ظهر على منتدى نايل موتورز عدة شكاوى من فيتيس mmt بتويوتا كورولا الجديدة والذى أعلنت الشركة عن حل مشكلته نهائياً، ومن بين هذه الشكاوى، يشكو أحد الأعضاء الذى يدعى فيرومودا ان فتيس سيارته من نوع تويوتا كورولا "بيرزّع جامد فى الغيارات".
وقال إنه ذهب الى التوكيل لكنه لم يفعل شيئا لافتا النظر إلى ان تلك المشكلة حدثت لديه مبكراً خاصة ان السيارة لم يبلغ عدادها سوى 15000 كيلومتر فقط.. وأضاف قائلاً"هما عارفين ان الفيتيس دة اصلا فيه عيوب صناعة يعنى حرام الفلوس اللى خدوها على اى حاجة خاصة به.!!".
ويضيف العضو وائل متحدثاً عن سيارته من نفس النوع،" الفيتيس فى سيارتى بدأ يضعف ويجيب رجه بسيطة في الطالعة وحاولت اكثر من مرة تصليحه لكن المشكلة لم تنته".
واكد فارس النجار - أحد الأعضاء -،"انا معايا تويوتا 2009 وخلصت الضمان من كام شهر والفيتيس دلوقت بيرزع جامد فى النقلة التانية والتالتة وبتتنطط فى الزحمة لما تشعّر بنزين وعايز تحرك العربية بالراحة وبالمناسبة انا عامل 111000 كيلو متر فى سنتين فقط"..وفى تعليقه على مستوى الخدمة فى التوكيل قال"العربية معملتش معايا N-error نهائى وروحت التوكيل الاسبوع اللى فات وقلتلهم على الرزع قالى هنعمل كشف ب 200 جنيه، بعد الكشف قالى الفيتيس طبيعى.. كنت هتجنن قعدت اعافر معاهم ساعتين ولا حد عبّرنى لافتا ان المعاملة اختلفت بعد الضمان". أما فراس النجار عضو المنتدى فلفت النظر الى التعديلات التى قامت الشركة بعملها فى سيارات العملاء الآخرين " بالمناسبة انا عامل 111000 كيلو متر فى سنتين بس العربية معملتش معايا N-error نهائى عملت التعديلات اللى كل الناس عملتها فقط "القطع الجديدة" كل مشكلتى هى الرزع اللى فى النقلة التانية والتالتة وساعات بيبقى ظاهر جدا وساعات ما يظهرش".. أما أحد الأعضاء والذى يدعى ميدو فقد لفت النظر الى ان هناك موديلات أخرى من تويوتا بخلاف كورولا تعانى من بعض العيوب قائلاً: "انا بجد نفسي كمان شركة تويوتا تتحمل المسئولية، في العالم كلو سحبوا العربيات من السوق بدون ما العميل مايتكلم معاهم الا عندنا هنا في مصر ... تويوتا أيجيبت عاوزة توفر ..... فيه عيب في التويوتا ياريس إسطوانة الدبرياج ... وانا عندي عربيتين يارس وفيهم نفس العيب الصحيح انهم يغيروها بدون ما يدفعونا 1500 جنيه"..وأشار الى الفرق بين توكيلات السيارات فى مصر وغيرها من الدول العربية ..".
شركة ديهاتسو التابع لشركة تويوتا واللي وكيلها عبد اللطيف جميل ملك وكينج التويوتا في السعودية طلع عيب فيها علبة الدريكسيون على طول بيغيروه ببلاش ومن غير ما العميل يفتح بقة حتى لو العربية برة الضمان، بس توكيل تويوتا رافضين يشيلو المسئولية خالص ... وعلى حساب العميل أي مشكلة فيها. "
بقى أن تستجيب الشركات لقرار جهاز حماية المستهلك والذى يقضى بحل شكاوى العملاء داخل الشركات أولاً قبل اللجوء لحماية المستهلك والذى لم يتم تفعيله حتى الآن.