شاهد.. مواطنون عن ارتفاع سعر الوقود: "قرار ظالم إحنا بقينا معدومي الدخل"

أثار قرار رفع أسعار الوقود غضب العديد من المواطنين، حيث اعتبروا أن هذا القرار ظالم ويؤثر على البسطاء الذين ظلوا يعانون منذ فترة من ارتفاع الأسعار بشكل مستمر، مما يجعلهم غير قادرين على المعيشة.
وأشار المواطنون، إلى أن تلك القرارات تعمل على محو فئة محدودي الدخل وتحولها إلى معدومي الدخل.
وأجمع عدد من المواطنين أن هذا القرار سيجعل الأسعار فوق طاقتهم، ويعجزون على سد احتياجتهم حتى الأساسية منها.
وقال رجب قناوي، إنه يعمل بإحدى الشركات الخاصة التي أكدت له أن مرتبه ثابت ولم يزيد حتى مع تلك الزيادة في الأسعار، معربًا عن استيائه من ثبات المرتبات وزيادة الأسعار بشكل متواصل، خاصة وأن مرتبه الذي كان يتقاضاه يصرفه على المواصلات ومصاريف منزله وأنه الآن يحتاج إلى ضعفه بعد تلك الزيادة.
وأضاف قناوي قائلًا:"ميرضيش ربنا اللي بيعملوا فينا ده بقينا بنصحى من النوم نلاقي زيادة، احنا مش عايزين من الدولة حاجة غير يسيبونا في حالنا حرام عليهم كده، الأنابيب لما تغلى هيأثر على بيتي وزيادة البنزين ده هيأثر في كل حاجة من أكل وكله هيزيد احنا في دايرة مقفولة لأن زيادة البنزين بيزود كل حاجة في مصر".
"مش منطقي تزودلي الأسعار بالشكل ده كل شوية والمرتب واحد، ازاي اكفي بيتي ومعايا زوجة وبنتين، لازم اجي على حاجة منهم يا الشغل يا عيالي وطبعًا مش هعرف اجي على حد فيهم"هكذا قال المواطن بنبرة مليئة باليأس ووجه عابس، مطالبًا الدولة والحكومة بالتوازن في الأسعار والزيادات والأجور.
وقال عباس حمدي:"ده ظلم ودي مش حكومة لا دي حكومة بالإعدام على الغلابة والشعب، هما بيزودوا كل شوية، بيعدموا الناس بالأسعار والغلاء، ده اللي عايش عيشة متوسطة ومحدودي الدخل بيموتوه يعني مش بس الفقير، هما مش بيفكروا في الناس البسيطة حرام كله ظلم، طبعا هما مش حاسين لأن مرتباتهم عالية وبتعدي الافات في الشهر لكن اللي بياخد الف جنيه هيعمل بيهم ايه".
وتابع سيد محمد:" المسئولين لو بيفكروا في الشعب مكنوش عملوا كده ، انا واحد ارزقي باخد 70 جنيه في اليوم اجيب بيهم ايه اكل ولا دروس للعيال ولا مواصلات اللي زادت بردو اللي بجنيه هيبقى باتنين وتلاتة ولا انبوبة البوتاجاز ولا اعمل ايه، كله هيغلى المنتجات في السوبر ماركت والسلع الغذائية علشان اي نقلة بالعربيات بالبنزين هتغلى اي حاجة بعدها، والإنبوبة من 15 جنيه من المخزن بقت ب30 جنيه ، الناس الفقيرة مش مستحملة، لا دي بقت الناس كلها مش مستحملين".
فيما قال أحمد مختار، أن المشكلة لو كانت مجرد رفع سعر الوقود كانت هينة ولكن الوقود بيرفع سعر كل شئ حتى الخدمات، قائلًا:"كده بقى فوق طاقتنا مش عارفين هنعمل ايه، خصوصا إن في ناس مستغلة كانت قبل الزيادة دي بشتري الانبوية ب50 و60 جنيه، دلوقتي ممكن تبقى الأسعار خيالية".
شاهد الفيديو..